MZP chuan Mizoram Public Service Commission (MPSC) chairman chu tun kar chhung ngeia bang turin an phut nawn.
MZP hruaitute chuan nimin khan Aizawl Press CLub-ah chanchinbu mite an kawm a, an president H Lalthianghlima chuan, MPSC hotute chu an thil tih dik loh chu sawi mam tum tawh lo tur leh Evaluator-te tihsualah puh loa, an mawhah la se an duh thu sawiin, MPSC zahawmna humhim a nih zel theih nan te, zirlai hna zawng mek te’n an rinna an nghah zel theih nan MPSC Chairman chu tun kar chhung ngeia bang tura an duh thu sawiin, an ngenna in awmzia a nei lo a nih chuan chairman chu ban a nih ngei theih nan a tul angin hma an la zel dawn tih a sawi.
MZP president chuan, Mizorama hna sang leh zahawm tak takte lak hna kalpuitu MPSC chu thalai hna zawng mek te’n an ring tawk hle a, hemi avang hian eng emaw sawi a awm chang pawhin a hming chhiat mai loh nan MZP in MPSC hmalakna chu a thlawp tlat thin tih sawiin, hetihlai hian Combined Competitive Examinations an kalpui hnuhnung berah erawh thil dik tawk loa hmalakna a awm ngeia an hriat thute, mark pek tawhsa thaichhiatna leh mark tihdanglamna hnuhma thahnem tak a awm thute, RTI Act hmanga Answer paper dil chhuah theih thin pawh kuminah chuan an rem ti lo thut tih a sawi.
Hetiang a nih laia thil diklo leh fello siamthat tuma hmalate “tlin loh vanga rilru na thil tih” ang leka an chhuah chu tha lo an tih thu an sawi a, dik lo thei lo, tisual ngai lo leh sawisel thiang lo anga an in chhal chunga, thubuai an nei fote chu inenfiah nan hmang se an duh thu a sawi.
MZP chuan NIT Mizoram-a Asst. Registrar hna lak leh AMC hnuaia hna laka mimal duhsak zawngte thun an tum chungchangah hma an lo lak tawh thute, hemi chungchang hi an en zuia, an bawhzui reng tih a sawi a, hetih mek laia MPSC-ah lehzel thil diklo tak tihna remchang kawngka a inhawng chu pawi an tih thu leh dik lo taka hna lak an dona kawngah ram mipuite thlawpna an mamawh hle tih an sawi bawk a ni.