Nilaini zinga NBA regular season khelhah Milwaukee Bucks player pawimawh Giannis Antetokounmpo a inhliam. Antetokounmpo inhliam tum hian Bucks chuan an khingpui Boston Celtics an hneh. Nilai zinga inkhel dangah LeBron James-a khelhna Los Angeles Lakers chu Golden State Warriors lakah a tlawm.
Eastern Conference hmahruaitu Boston Celtics lakah Milwuakee Bucks in point 104-91 a hnehna an chan tum hian Bucks player pawimawh Giannis Antetokounmpo chuan quarter thumnaah hliam a tuar a, a khelhpuiten an kaichhuak. Hliam vanga a chhuah hma hian point 15 a thawkchhuak a, ball sawhlet vawi 8 a dawn baka assist vawi 7 a nei tling hman bawk. A hliam hi enkawl thuai ni mah se Celtics a hmachhawn zui thei tawh lo. MVP vawi hnih ni tawh Antetokounmpo hi engtia rei nge a chawlh ngai dawn tih a la chiang thei lo.
Bucks hian NBA regular season kal mekah khelh hmabak pathum an la nei a, Eastern Confrence-ah pahnihna ni chungin season an khar theih ngei a beiseiawm.
Nilaini zinga inkhel dangah LeBron James chetha mah se LA Lakers chuan an mikhual Golden State Warriors an hneh zo chuang lo. Warriors lakah point 134-120-a an tlawm tum hian Lakers player pawimawh LeBron James chuan point 33 a thawkchhuak. Lakers an hneh tum hian Warriors tan Klay Thompson chuan point 27 a thawkchhuak a. Stephen Curry chuan point 23 a thawkchhuak ve bawk.
Western Conference hmahruaitu Minnesota Timberwolves chuan nilai zinga an khingpui Washington Wizards chu point 130-121 in an hneh. Wizards laka an chak tum hian Timberwolves tan Anthony Edwards chuan point 51 zet a thawkchhuak a, hei hi NBA a hmachhawn tawh zawng zawnga point a thawhchhuah tam ber tum a ni.