India ram chhunga football club te inelna lian ber Indian Super League (ISL) 2023-24 hmawrbawk a hnai a, League champion tur a la chiang lo thung. League Shield inchuhna boruak a la nung viau rih a, table chung ber luah chunga season khar thei club pahnih an la awm. ISL season kal meka club hrang hrangte dinhmun kan thlir kual thuak thuak ang.
- Champion nih inchuhna
ISL a team 12 ten vawi hnih thelh an khelh zawha point hmu sang ber hi League champion an ni a, League Shield an la thin. League a chetha zual paruk ten playoff semi-final an khel a, I League champion tur an zawng chhunzawm leh thin. League champion ni thei pali an awm mek a, an dinhmun leh an hmabak tarlang zui ila.
- Mumbai City FC
Lallianzuala Chhangte khelhna Mumbai City FC hi champion lai an ni a, League champion nawn leh thei dinhmun tha takah an ding mek bawk. Mumbai City FC hian khelh 21 atanga point 47 hmuin table chung ber an luah mek. Khelh hmabak khelh khat an la nei a, point 50 hmu chunga season khar thei dinhmunah an ding mek. An khelh hmabak hi pahnihnaa awm mek Mohun Bagan an ni a, Mohun Bagan an hneh a nih chuan League champion an ni nawn leh ang.
- Mohun Bagan Super Giant
Kolkata team lian Mohun Bagan hian khelh 20 atanga point 42 hmuin pahnihnaah an awm mek a, khelh hnih khelh hmabak an la neih vangin League champion ni thei dinhmunah an ding. An hmachhawn leh turte hi Bengaluru FC leh Mumbai City FC te an ni. Khelh hnih an chak zawn thei a nih chuan point 48 an hmu ang a, League champion an ni ang. League champion ni thei turin an chak zawn ngei ngei a ngai thung. Mumbai City FC leh Mohun Bagan te pahnih hi League champion ni thei dinmuna ding mek an ni.
- FC Goa
Goa club lian hian khelh 21 atangin point 42 an hmu mek a, khelh khat chauh khelh hmabak an nei tawh. An khingpui leh tur Chenniyng FC lakah an chak a, Mohun Bagan an tlawm zawn a nih bawk si chuan pahnihna ni chunga season khar thei dinhmunah an ding.
- Odisha FC
Anni hian khelh 21 atangin point 39 an hmu mek a, point 42 hmu chunga season khar thei dinhmunah an ding. An khingpui leh tur hi pariatnaa awm mek NorthEast United an ni. Odisha FC tan thil danglam a thlen a rinawm tawh lova, top 4 huang luah chungin season an khar dawn tih a chiang tawh a. Palinaah awm mekin, panganna awm mek Bengaluru FC tan lehpelh theih an ni tawh lo.
- Kerala Blasters
Anni hian khelh 21 atangin point 30 an hmu mek. Hyderabad FC an hmachhawn zui leh dawn a, play-off khel turin an tling chiang tawh.
- Chennaiyin FC
Chennai club lian Chennaiying FC hian khelh 21 atangin point 27 an hmu mek a, FC Goa an hmachhawn zui leh dawn. An hmachhawn leh tur hi Palinaa awm mek an ni a, an hmabak a hautak dawn. An match hnuhnung berah an tlawm a nih chuan playoff khel phak lo thut thei dinhmunah an la ding.
- East Bengal FC
Kolkata club hlum East Bengal hian khelh 21 atangin point 24 an hmu mek a, Punjab FC an hmachhawn zui leh dawn. 11-naa awm mek Punjab FC an hneh a nih a, Chennaying an tlawm a nih bawk chuan playoff an khel phak chiah chiah ang.
League champion tur a la chiang lova, playoff khel tur a la chian loh bawk laiin ISL atanga tlahniam tur erawh a chiang tawh thung. Khelh 21 atanga point 8 chauh la hmu Hyderabad an tlahniam chiang tawh a. I League champion thar Mohamedan SC chu ISL-ah an kaisan dawn tih a chiang tawh bawk.