April 9, Thawhleh zan khan champions league quarter-final khelh tan a ni a. Quarter-final khel hmasa pali zingah hnehna chang an awm lo. Arsenal chuan an mikhual Bayern Munich lakah tlawm an pumpelh hram a. Goal 6 zet luhna inkhel hmuhnawm takah Real Madrid in an mikhual Manchester City lakah tlawm an pumpelh ve bawk.
- Arsenal 2-2 Bayern
EPL hmahruaitu Arsenal chuan Emirates Stadium-ah German champion Bayern Munich an mikhual. Bayern Munich hi an ngam hleih theih loh, UCL-a an kawng daltu lian tak an ni thin. Hnuhma chhe tak an neihna club lakah bul tan tha mah se a tawp an khar tha thei lova, an mualah tlawm an pumpelh hram. Bayern Munich khelmual; Allianz Arena-a inlan zui leh tur an nih vangin Arsenal hmabak a hautak dawn hle.
Mikel Arteta hnuaia hmasawn tak Arsenal hian Bayern Munich lakah bul an tan tha a, goal pawh an thun thuai. Inkhel tan atanga minute 12-na lekah Bukayo Saka chuan Ben White atanga ball a dawn chu a khalh rem zet hnuin mawi zetin a pet kual lut a, pui zetin hmahruaina goal a thun. Hma takah goal an thun vangin Gunners an phur a, na takin an mikhualte an nawr chhunzawm. An mikhualte an nawr na lutuk an tuar a, goal an thhuah thuai thung. Bayern hian fuh zetin Arsenal an nawr tlang a, Goretzka siamsak atangin Serge Gnabry chuan goal a thun a, minute 18-na lekah an si phurh a sut.
Goal khat ve ve an thun hnuin Arsenal in ball an chang tam chhunzawm a, goal pawh an thun belh teuh viau. Bayern tlarhma tlanchak tak tak ten EPL-a tlarhnung phui thei tak Arsenal tlarhnung an timualpho a, an tlan pel fua fuau. German club hian counter attack chhawr tangkaiin penalty an hlawhchhuak. Arsenal laka goal thun thei tak Harry Kane chuan a hlawhchhuah penalty chu minute 32-naah awlsam zetin a pet goal a, Bayern Munich hmahruai letna goal a thun. An si phurh an sut mai theih loh vangin Gunners hian hnufual zawk ni chungin chawlhlawk an hmang.
Chawlhlawk hnu lamah inkhel a hmuhnawm zui hle. An si phurh an sut lawk thei loh hnuin Mikel Arteta chuan fing takin player a thlak kual a, Gabriel Jesus leh Leandro Trossard te a luhtir a, a tifuh hle nghe nghe. Bench atanga lut a goal thun thei tak Leandro Trossard hian minute 76-naah goal thunin an si phurh a sut.
Goal hnih ve ve an thun hnuin inkhel a hmuhnawm zui viau a, goal thun tumin an innawr tawn nasa hle. Hun tawp dawn tepah Saka chuan Arsenal chakna goal thun theihna hun tha zet mai a nei. Saka hian si nghak Manuel Nuer chiah a hmachhawn tawh a, pet goal thei dinhmuna a din laiin a shot duh mai lova, ball a khalh kual. Ball a khalh kualna lamah penalty hlawhchhuah tumin a thluak a vawrh zui bawk a, a tisual. Arsenal hi referee in penalty pe hman zet mah se VAR hmangin hnawl a ni thung a, Bayern an him. Arsenal in penalty an hlawhchhuak lo leh Harry Kane hnawhchhuah a ni lote chuan titi a siam zui hle.
An muala tlawm an pumpelh hi Arsenal tan result thaa ngaih theih a ni a, Mimuala inlan zui leh tur an ni vangin semi-final lut turin an hmabak a hautak viau thung. Inelna dangah an chetthat loh vangin Bayern hian champions league-ah an insawrbing ngei dawn a. Chu chu dinhmun khirh zawka Arsenal an din theihna chhan a tling ang. Bayern Munich leh Arsenal te hi April 17, Nilai zanah an inching fel ang.
- Real Madrid 3-3 City
Thawhleh zana inkhel ngaihven hlawh takah champion lai Manchester City chu UCL a club hlawhtling ber Real Madrid hmachhawn turin Santiago Bernabeu-ah an lenglut. An lenluhna mualah City an khel tha viau a, goal thum an thun. City in an goal thum thun hi an chakpui zo bik lova, goal ruk luhna inkhelah chak zawk an awm lo.
City hian Santiago Bernabeu-ah bul an tan tha viau a, inkhel tan atanga minute hnihna leka Bernardo Silva chuan free kick pet goal in, hmahruaina goal a thun nghal. Hma takah goal chhuah mah se Real Madrid an insiamtha thuai a, goal hnih thun zawnin hma an hruai let thuai. Minute 12-na lekah Rúben Dias own-goal hmangin La Liga hmahruaitu Real hian an si phurh an sut. An si phurh an sut hnu lawkah Real hian hmahruaina goal an thun zui leh nghal zat. Fuh zeta ball a umtlang hnuin Rodrygo chuan City si nghak kap karah a pet goal a, hma an hruai letna goal a thun. Minute hnih chhung leka goal hnih an thun hmang hian 2-1 a hmahruai chungin chawlhlawk an hmang.
Chawlhlawk hnu lamah City an khel tha zui viau a, goal hnih an thun zawn. Phil Foden chuan minute 66-naah Stones siamsak atangin goal a thun a, an si phurh a sut. Foden goal thun hnu lawkah Grealish siamsak atangin defender Josko Gvardiol chuan an goal thumna a thun zui leh zat a, 3-2 in hma an hruai ve leh ta chiah.
Hnufual zawka an tan nawn leh hnuin Real Madrid in tlawm pumpelh ngei an tum a, an hlawhtling. Federico Valverde chuan minute 79-naah goal thunin an si phur a sut nawn leh. Valverde goal thun hnu hian goal dang a luh belh thei tawh lova, team lian pahnih Real Madrid leh Manchester City te chu 3-3 in an inhnehtawk ta a ni.
Manchester City leh Real Madrid te hi kar leh nilai zanah an intum nawn leh dawn a, Etihad Stadium-a inhmachhawn tur an nih vangin City chian semi-final luh theihna hun an nei tha zawk tura ngaih a ni.