Nilai zan khan Champions League quarter-final, first leg khelh chhunzawm a ni a, La Liga club lian pahnih; FC Barcelona leh Atletico Madrid ten hnehna an chang. Bracelona in Mimualah PSG an hneh a, Atletico Madrid in an mikhual Borussia Dortmund an hneh ve bawk.
- Barca an tlo
An tla hniam hret a, La Liga lamah beisei ang result an neih loh changin champion FC Barcelona in sawisel an hlawh thin. Sawisel an hlawh nasat thin vangin an manager Xavi ngei pawhin season tawp ruala a hna a bansan tur thu a puang hial tawh. Pressure sang tak chungin champions league an hmachhawn a, UCL-ah erawh Barca an tlo ta nek a, Mimualah PSG an hneh tak hial vangin Catalan club lian an phur thar hle.
Barcelona leh PSG te hi team inhnehtawk tak mai an ni a, quarter-final-a an inhmachhawn pawh hian ngaihven a hlawh hle. Inkhel ngaihven hawh tak quarter-final First leg-ah PSG in beisei an phak lova, an mualah an tlawm ringawt. Parc des Princes a lenglut Barcelona tan Raphinha chuan minute 37-naah hmahruaina goal a thu a, he goal hmang hian si khat faia hmahruai chungin chawlhlawk an hmang.
Chawlhlawk hnu lamah PSG in bul an tan tha ve thung a, hma takah goal hnih an thun zawn. Second half tan atanga minute thumna lekah Barcelona player hlui Ousmane Dembélé chuan a team hlui lakah goal thunin PSG si phurh a sut. Dembele goal thun atanga minute hnihna lekah Vitinha chuan PSG hmahruai letna goal a thun zui leh zat a, Ligue 1 champion PSG in an mikhual Barcelona an lehthal.
Inhnaihchilh taka goal an chhuah zawn hnuin Catalan club lian an insiamtha thuai. Goal hmahruai thuntu Raphinha chuan minute 62-naah goal thunin an si phurh a sut. goal hnih ve ve an thun hnuin inkhel a hmuhnawm chhunzawm viau a, goal thun tumin an innawr tawn nasa hle. Goal thun tuma an innawr tawn viau hnuin defender Andreas Christensen chuan minute 77-naah Barcelona hmahruai nawn lehna goal a thun. Andreas Christensen goal thun hi hun tawp thlengin PSG in an sut thei lova, an mualah ngei uiawm takin an tlawm zui ta a ni.
An mualah an tlawm vangin champions League-ah champion chaka tuihal PSG tan semi-final luh a harsa lehzual sauh dawn. Barcelona mualah an leng lut ve thung tawh dawn a, Mimualah chak ngei an mamawh. La Liga lamah an champion nawn dawn lova a lan tawh vangin Barca tan ULC hi a pawimawh hle a. UCL-ah an champion hlauh a nih chuan Xavi pawhin a thutlukna sut in Barcelona a enkawl chhunzawm a beiseiawm.
- Atletico Madrid pawh an chak
France ramah Barcelona in hnehna an chan lai hian La Liga club lian dang Atletico Madrid chuan Cívitas Metropolitano-a an khingpui Borussia Dortmund chu 2-1 in an hneh a, semi-final an hnaih ve sauh bawk.
Atletico Madrid hian an mualah bul an tan tha viau a, chawlhlawk hmain goal hnih an thun hman. Inkhel tan atanga minute lina lekah Rodrigo De Paul chuan hmahruaina goal a thun. Hma takah goal an thun vangin La Liga club lianin inrintawkna sang zawk an nei thar a, an mualah phur takin an inlan. An mualah ngei phur taka inlan Atletico Madrid tan hian Samuel Lino chuan minute 32-naah an goal hnihna a thun a, si hnih faia hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, goal thun tumin an innawr tawn nasa hle. Ball chang tam zawk ni mah se mualneitu Atletico Madrid in goal an thun belh thei lo. An him hram thin hnuin Dortmund an chefuh a, Sébastien Haller chuan minute 81-naah goal thunin an si phurh a sut then. Haller goal thun vangin Dortmund hian beiseina thar nei bawk mah se goal dang an thun belh thei tawh lova, Atletico Madrid lakah 2-1 in an tlawm zui ta a ni.
Champions League quarter-final, second leg hi April ni 16 leh 17 zanah khelh a ni dawn a. Atletico Madrid leh Borussia Dortmund te hi April 16, thawhleh zanah an inhmachhawn nawn leh dawn. Quarater-final-ah La Liga club pathum an awm a, Atletico Madrid, Barcelona leh Real Madrid te semi-final lut thei dinhmunah an la ding vek. Barcelona in PSG an hneh a, Atletico Madrid in Dortmund an hneh a nih bawk chuan an ni pahnih hi semi-final-ah an inhmachhawn zui dawn a. Semi-final an lut ve ve a nih chuan La Liga club pakhat talin UCL final an khel dawn tihna a ni nghal bawk.