#Zozam Times April 12: BJP-in Lok Sabha MP inthlan lo awm tura Mizorama candidate 6 zingah INC Candidate Lalbiakzama tih loh chu ruling bench, BJP sorkarna lama thua, BJP thawhpui thei, BJP thian thaa neih tum vek tur nia an lan thu an sawi.

BJP Mizoram thupuangtu Lalremsangi Fanai-in thuthar thehdarhtute kawmin he thu hi vawiin khan a sawi a. INC Candidate Lalbiakzama’n ‘BJP do turin Congress party ka zawm’ a ti nia sawiin, hei hi hnam leh hnam, sakhua leh sakhua inhuat theihna lam hawia nih thu leh pawi an tih thu a sawi.

BJP Mizoram thupuangtu chuan Congress hotu te pawhin BJP chu Kristiante nuai chimih tumtu, secular paihbo tumtu, UCC kalpui tumtu nin an sawi thin tih sawiin, “Article 370 lakkian chungchang nen sawi zawma Mizo mipuite min sawithaihna tawngkam an chhakchhuak fo hi, Mizoram BJP chuan tha lo a ti hle a ni” a ti.

Lalremsangi Fanai chuan “Mizoram State Special Provision Article 371G lakbo mai hlauhawm leh himlo angin kan insawithawih fova. Engvangin nge min lakbo sak ve ang, tih hi zawhna pawimawh a ni” a ti a. Article 370 an lakkiansak tak Jammu & Kashmir history leh Mizote history hi thawnthu hran hlak a nih bakah, Jammu & Kashmir angin mipui thlan sorkar ding hleitheilo, mipuite ralmuanna awm lo, hmasawnna kal thei lo, Law & Order kenkawhna tlachhiain, President’s Rule ah lut ve fo ni ila insawithaihna awmze nei a ni thei chauh ang” a ti bawk.

BJP kaihhruai sorkar hmalakna hrang hrang leh ram chhung thil thleng dang tam tak hrim hrim pawh BJP eptu party thenkhat ten a nihna hrulah dik tawk lovin mipui hriatah an sawi nasa niin BJP Mizoram thupuangtu chuan a sawi a. BJP-in Kristian te a nekchep hle anga sawi awm thin pawh a nihna tak hre fiah tura zirchian chuan thubelhchiandawllo a tam hle niin a sawi bawk a ni.