- Ramhluna Hnamte
April ni 15, 1974 a din Lunglei Bazarveng YMA Branch kum 50 tlinna, Golden Jubilee chu April ni 15, 2024( Thawhtanni) hi a lo ni reng ta mai. Zoram Chhimbial chan lamah hian YMA hi a ding tlai deuh na a, Lunglei Bazarveng hi Chhimbialah chuan a upa pawl chu a ni ve awm e.
April ni 21, 1980 ah Lunglei Govt. College ah ka hna ka zawm a, Lunglei Bazarveng hi kan in leh lo awmna a ni. Ka pa hi Sorkar hna thawk pem kual deuh reng a nih avangin ‘khua’ ti a han sawi tur meuh hi kan nei mang lo va. Ka pa a hna atanga a chawlh hnuah 1971 ah Lunglei Bazarveng-ah kan cheng ve tan a. Kei chu hmun danga kum 10 dawn lai lehkha zira ka thang bo avang leh Krismas chawlh te pawh ka zirna hmuna hmang mai thin, nu leh pa te chenna a haw ngai meuh lo ka nih avangin kan vengah hian hmelhriat leh thian pawh ka nei mumal meuh lo a ni.. Lunglei Bazarvenga ka khawsak ve tanna chu College a ka thawh tan kum 1980, April thla chawhnu atang chauhin a ni a, ka nu leh pa erawh chu he vengah hian kum 9 zet an lo awm tawh a ni.
Lunglei Govt. College a kum khat dawn ka thawh ve hnu, March ni 7, 1981, Inrinni zanah Lunglei Bazarveng YMA Branch Secretary charge ka lak thu ka diary ah ka ziak a, kan inthlanni erawh ka lo chhinchhiah lo tlat mai. Hemi hma karah ni ngeiin ka ring.
Chutia awm ve ngai hlei lo Secretary a thlan ka lo ni ta mai kha thenkhat chuan ‘Mikhual a ni maw YMA Secretary ah kan thlan tlin’ lo ti tawk te pawh an awm. Mi mah in leh lo neih ve na veng ti a lo intih khawtual ve tawh nen, ka hnual hman hle. Mahse Secretary hna ka han thawk ta chu ka ti chhe lutuk bik lo a ni ang, mikhual min titu te nen chuan kan inkawm ngeih ta phian a, nuam ti takin ka thawk ta a ni. Kum 1987 thleng Lunglei Bazarvengah hian Office Bearer ka lo ni ve tawh a ni.
Kan hun lai khan tuna College Veng ni ta hi Bazarveng VC area a ni thin a, ‘Bazarveng Thar’ tih a ni thin. Kan bial kha a zau hle thin a, tunlai angin lirthei a la awm tam lo va, paidal ngai a tam hle a, hahthlak tham ve tak a ni thin.
Keinite Secretary te kan han nih ve kha chuan Bazarveng YMA kha kum 7 vela upa a ni tawh a, Secretary engzatna nge ka nih ve tih erawh ka hre lo. Hetia han ziah takah chuan Bazarveng khawtlang tana thahnem ngai tam tak zingah Tv.Zohmingliana(L) te, Tv. Rosiama Chawngthu(L) te rilruah an lo lang uai uai mai. He Golden Jubilee hunah hian an ngaihawm zual hle a ni. Zan rei tawh hnua mitthi lumen ngai an awmin Tv. Zohmingliana’n thalai awmna in tin fang kualin lumen turin nula leh tlangvalte a kai tho ngat ngat thinte kha a lo thain a lo taima thin mang e. Lumennaah khan thalai kan tlem ngai lo reng a ni. Sawi tur a va tam em, lung a leng thar hle mai. YMA Secretary ka nih hma, June ni 16, 1980 a Bazarveng YMA hla ka phuah ‘Bazar YMA Kan Ni’ tih chu, phumbo a ni daih tawh emaw ka tih laiin he Golden Jubilee a sak tur hian an zir a ni tih min rawn hrilh a, ka lawm hle mai.
Hruaitu hlui chawimawina te neiin lawmpuina certificate te pawh an pe dawn bawk tih leh min pe ve dawn tih ka hria a, ka lawm leh zual hle. Ropui leh hlim taka YMA Golden Jubilee hmang turin Lunglei Bazarveng YMA memberte te leh mipuite duhsakna ka hlan e. Viva La Lunglei Bazarveng YMA!