AZL: Mizoram Truck Owners’ Association hotute chuan nimin khan Larsap Dr Hari Babu Kambhampati chu a chenna, Raj Bhavan-ah kawmin an harsatnate an thlen.
Larsap hnenah MTOA hruaitute chuan Bairabi railhead atanga Mizoram hmun hrang hranga buhfai dahkhawlna hmunah buhfai phurh sak turin FCCI Contractor-te hnuaiah an inhlawh tih an sawi a. Tun dinhmunah Bairabi rel station-a rel lut leh chhuak mumal lo tak avang leh, Bairabi Station chuan hmunhma, hmanrua leh thawktute a neih that tawk loh avangin hmun chep takah truck tam tak inhnawhkhawm a ngaih avangin a hun takah bungruate an hlan thlak theih loh phah thin tih an sawi a. He an harsatna te sutkian a nih theih nan Larsap chu Railways hotute leh FCCI hotute biaksak turin an ngen a ni.
Larsap chuan MTOA hruaitute thu thlen leh an harsatna tawh chungchang te a ngaihthlak hnuiin a tul anga hmalakpui a tum tih a sawi a, MTOA lam pawh General Manager, North-East Frontier Agency (NEFA), Guwahati chu hmu turin thurawn a pe a, recommendation letter a ziahsak nghal bawk.