- Lallunghnema, Charity Lodge
Consumer huang chhiartute in zavaiin chibai ka bûk a che u.
In dam lo sei mawlh rawh se.Ka article hi chhiar ula, hman tangkai lo tum zel teh u….ka’n ti ve khang lang a nih chu!
Bênga kan hriat leh mita kan hmuhte hi thil tha a nih ngai chuan chhawr tangkai zel tum ila. Hman tangkai lohva a liam mai tur hi a uiawm takzet thin a ni.
Heng thu rangkachak tha eltiang:
- MRP aia sangin thil lei suh,
- Expiry Date liam hnu thil lei suh,
- I thil leite chu bûk chî a nih chuan bûktir zel rawh,
tih te hi a taka hman tum zel tur tih a ni . Hlâwkpuitu tur chu nangmah bawk i ni si a.
Social media hi kan thian zinga mi a ni a, kan hmanraw tangkai tak a ni bawk.Social media hi hmang sual an tam hle laiin hmang tangkai an tam hle bawk. Kei ve hian ka thil hriat duh tam tak awlsam tê têin ka hriat theih phah a. WhatsApp-te hi ka chhawr tangkai thin hle a ni. Thuziak thin mî ka nih avangin ka article hi digital hmangin ka buatsaih thin a. Digital hmangin chung ka article-te chu Editor-te hnenah ka thawn thin a, an ni’n an lo ti chhuak thin a ni. Hmêl inhmu kher lovin thu leh hla kan inchhim tawn thei a. Inhmu lovin a kuma kum, a thlaa thla kan thawkho thei tho zu nia!
Zozam Times chhungkua a mi Pute: TK-a te, Chda te, Âitêa te, Robert-a te leh Desk Editor Vantea te, Tv Kima te leh tu tu te emaw ni… ho hmel pawh
nikum chhung khan vawi khat tê mah zu hmu lo i maw le!
WhatsApp group pakhat, ka tel vena a awm a. He group hi a tha viau mai. He huangah hian memberte an inhnial fiam nasa thin a, na tak takin an inkâp fiam thin a, na tak takin an inchhâng thin bawk. Mahse, thinrim an awm ngai lêm pawhin ka hre lo hial! An inhaw lo khawpin ka hre thin bawk. He groupah hian ka tawng chhuak ve zauh zauh thin. An fiamthu hi a sâng a, kei chuan ka tlin ve meuh lo.
Heng WhatsApp group-a ka tel chhan ber chu consumer awareness neih nân a ni. Mahse, thil hi a lo mak khawp a. Consumer issue ka han tarlan chang te hian like- tu ka nei mang hauh lo zu nia. Fing vâr âwm tak tak a ka ngaihte hian chhiar pawh an chhiar ka ring lo hial a ni. Hetih lai hian mi thenkhat chuan ka thu leh hlâte chu min lo like -sak ve liam liam bawk a. A thente phei chuan ka thuziak te hi an lo chhawr tangkai lawi a. A lawmawm tho mai,Mi eng emaw zatin consumer thu hla ka ziakte chu an lo chhawr tangkaipui thu min hrilh hial a ni.
Tichuan, kan sawi zel ang. Group pakhatah hian message duhawm êm êm, ngaihthlak ninawm lo tak ka chhiar a.
Hetiang hian a inziak a nih chu –
“Two wheeler taxi driver-in rate aia to a passenger hruai a dil tih hre chhuakin, tlaiah a passenger hi an inah kal chilhin pawisa a pe lêt.”
- Chuan man pe lêt then:
“Aizawla two wheeler taxi driver pakhat chuan a passenger hnena chuan man (fare) a dil chu midang tlân thinna rate aiin a to tih a hriat chhuah avangin pawisa a pe lêt then leh.
Tun hnai khan mi pakhat chuan chhunah Armed veng atangin Salem venga an in thleng two wheeler taxi a hmang a, a passenger hnenah hian chuan man atan Rs 230/- a dil a. A passenger pawh hian sawi buai loin, driver sawi ang zat hi chuan man atan a pe a.
Mahse, a hnuah a tlanna rate chu a to lutuk tih a thian dangte kâ atangin a hria a,a kal a, ” Ka tihsual palh”, a ni.
Helamah ka tlan ngai lova, thiante ka zawt a, rate ber ka en lo a, ka rilru a nuam thei ngang lo’” tiin Rs. 80/- chu a passenger a pe lêt leh. Thlalak ka zoom chin two wheeler taxi hi MZ 01 X- 0382 niin kan hria. – Bengvarna
He chanchin duhawm tak hi social media ah a darh chak hle a,Fakna thu pawh a ri ring khawp mai! Hei vang tak hian Consumer Huangah hian ka han tarlang ve duh hrim hrim a ni.
Kan ramah hian mi entawntlâk hi an tam lova, thil tha ti hi an tlêm hle a. Mahse, heng mi felho zarah hian kan nung thei tâwk tâwk chu a ni si a.
Consumerte tana malsawmna nih hi thil harsa tak a ni lo. Tlâwmna nun leh chân ngam nun neih a ngai a. Rinawmna vawn a tul hle bawk a ni.
Consumerte khawvêlah hian sumdawng rinawmte, dawrkai rinawmte hi an hlu êm êm a. Sumdawng leh dawrkai rinawm lo erawhin ram mipuite tan chhiatna hri lêng tlukin an hlauhawm a ni. Chuvangin i dikna leh i chanvo chu huaisen takin humhim rawh. Engkim hi i tâ a ni a, thil zawng zawng hi i ta a ni lo thei bawk.” ‘Knowledge is Power’ tih hi theih nghilh lul suh. Vawng reng ang che.
Huaisenna a inthuamin,
Hlau chungin thil lei suh.
Harsatna i neih chuan: CENTRE FOR CONSUMER EDUCATION pan rawh. Mahni kal kher a ngai lo.-9862288182/9402321590 i be thei e.