UFC fighter lar Conor McGregor chu Octagong-ah a kir leh thei dawn hnai a, Michael Chandler nen an intum hun tur ruat fel niin, June 29-a UFC 303 khian Las Vegas-ah an inhmachhawn ang.
Fighter thawm nei lian tak McGregor hian July 2021 a Dustin Poirier nen an inhmachhawn tumin a ke ruh a titliak a, hei vang hian kum thum dawn fight a hmachhawn tawh lo. A hliam a dam hnuin Bellator lama fighter lar tak Michael Chandler nen intum turin ruat fel nghal a ni. A khingpui tur chiang hma viau mah se beisei angin an intawng mai thei lo thung a, tunah chuan an intum hun tur atan UFC 303 ruat fel a ni ta nge nge.
Weight category hniha champion hlui McGregor hi light-weight-ah inlan thin mah se Chandler nen hian welterweight-ah an inhmachhawn dawn. A khingpui tur Chandler hian MMA-ah fight vawi 31 a hmachhawn tawh a, vawi 23 chak in, tlawm zawkah vawi riat a tang tawh. Irish fighter McGregor hian MMA-ah fight vawi 28 a hmachhawn a, vawi 22 chakin, vawi ruk a tlawm tawh. 2016 khan lightweight leh featherweight kawnghren a kawl kawp a, UFC fighter zingah weight hniha champion hmasa ber a ni nghe nghe. 2016 hi a vul vanglai a ni a, fight a hmachhawn hnuhnung lamah chak a harsat ta tlat thung.