#Zozam Times April 15: Lok Sabha inthlan puan a nih hnu, kumin March ni 16 atanga vawiin thlengin Mizoram Police-in ND&PS Act tlawhchhanin ruihhlo leh a kaihhnawih thubuai 33 an ziaklut tawh a, zu leh a kaihhnawih thubuai 64 an ziaklut tawh.

Mizoram DGP Anil Shukla chuan vawiin tlai khan thuthar thehdarhtute kawmin, Lok Sabha inthlan hmachhawn tura an hmalakna hrang hrang te a hrilh a. Inthlan puan a niha model code of conduct hman a nih hnu ah vawiin thlenga ND&PS Act tlawhchhana thubuai 33 an ziahluh tawh kaihhnawihah mi 35 an man tawh tih sawiin, zu leh a kaihhnawih thubuai 64 an ziahluh tawh kaihhnawihah mi 76 man an ni tawh tih a sawi.

Kumin March ni 16 atanga vawiin thlenga heroin an man tawh zat Kg 37.535 a nih thu leh hei hi tualchhung rate-a chhutin Rs. 2,68,72,650 man hu a nih thu DGP chuan a sawi a. Cannabis Kg 1250 an man tawh thu leh tualchhung rate-a chhutin Rs. 60,250 man hu a nih thu a sawi.

Rakzu leh a kaihhnawih te bakah Sapzu leh Beer pawh Rs. 2,10,51,135 man hu an man thu DGP chuan sawiin, damdawi, ruihhlo, zu leh a kaihhnawih an man zawng zawng hlut zawng, tualchhung rate-a chhutin Rs. 4,79,84,035 nia chhut a nih thu a sawi.

Inthlan puan hnu kumin March ni 16 atanga vawiin thlengin Mizoram Police-in silai leh puak thei thil dang kaihhnawih thubuai 8 an ziaklut tawh tih DGP chuan sawiin, heng thubuai kaihhnawihah hian mi 13 an man niin a sawi bawk.

Lok Sabha inthlan lo awm turah Mizoram Police 4600 an duty dawn a, heng zinga mi 1047 te chu Uttar Pradesh, Madhya Pradesh leh Bihar-a duty tur an ni. Mizoram hmun hrang hrangah Mizoram Police te bakah hian CAPF Coys 12 an duty dawn a. Mizorama polling station 1280 zinga polling station 19 chu ven uluk ngai bik huanga dah niin, hmeichhe hlang duty na tur pink polling station 138 a awm bawk a ni.