#Zozam Times April 15: MPCC President Lal Thanzara’n Lok Sabha inthlan lo awm tur chu Mizoram leh mipuite tan mai ni lo, India ram pum leh mipuite tan a pawimawh dawn hle niin a sawi a. “India ramah Democracy chawinunin a awm dawn nge, mipuite zalenna rahbeha awmin, mimal thuneihna (Autocracy) hnuaiah kan lut dawn tih a hril dawn” a ti.

Lal Thanzara chuan vawiin khan Aizawl Press Club-ah thuthar thehdarhtute kawmin he thu hi a sawi a. Narendra Modi kaihhruai NDA sorkarin mipuite zalenna chanvo (right to freedom) nasa taka rapbetin Central sorkar institution pawimawh – CBI, Enforcement Directorate, Income Tax Department leh a dang tam tak an hmang sual niin a sawi a. Mipui vantlang leh an lamtang lo political party leh hotute harsatna siamsakna hmanruaah an hmang nasa a, mipuite zalenna rahbehna hmanrua a heng sorkar institution hmansualna chu Narendra Modi kaihhruai NDA sorkarna hnuaiah a zual zawngin chak takin a kal zel niin a sawi.

Narendra Modi kaihhruai NDA sorkarin kum sawm kalta chhungin sakhaw zalenna nasa takin an rabbet nia sawiin, hei pawh hi a zual zawnga a kal zel dan a taka hmutute chu kohhran hrang hrang leh Mission field a thawktute an nih thu Lal Thanzara chuan a sawi a. India rama dan hremi (Lawyer) lar berte zing ami Prashant Bhushant chuan “kum 2024 Lok Sabha inthlanah NDA sorkar thlan tlin leh a nih chuan Indian Constitution hnuaia Fundamental Rights kan neih te hi tihbovin a awm ang” a ti hial niin a sawi.

Central Finance Minister ni mek Nirmala Sitharaman pasal Parakala Prabhakar, Accademician hmingthang pawhin “Prime Minister Modi-a hi thlan tlin leh a nih chuan Indian Constitution tihdanglam a ni anga, Lok Sabha election hi kan neih leh theih pawh a rinawm loh” a ti hial niin MPCC President chuan a sawi a. “Kan ram, kan hnam leh kan sakhaw him nan Centrala BJP kaihhruai NDA sorkar hi paihthlak a ngai a ni” a ti bawk.

Lok Sabha inthlan lo awm tura Mizorama INC Candidate Lalbiakzama pawhin BJP kaihhruai NDA sorkar paihthlak a tul chhan hrang hrang te a sawi ve bawk a ni.