Zanin zanlai dar 12:30-ah champions league quarter-final second leg khelh tan a ni dawn a, Estadi Olímpic Lluís Companys-ah FC Barcelona leh French Ligue 1 champion Paris St-Germain te an inching fel dawn. Signal Iduna Park lamah Borussia Dortmund leh Atletico Madrid te an inching fel ve dawn bawk.
UCL quarter-final a inkhel ngaihven hlawh zinga tel La Liga champion FC Barcelona leh French Ligue 1 champion Paris St-Germain te hi chawlhkar liam ta khan Parc des Princes-ah an lo inhmachhawn tawh a, 3-2 in Barcelona an chak. Mimualah an chak tawh vangin Catalan club lian hian inrintawkna sang zawk nen PSG an mikhual thei dawn. An mualah goal an chhuah lo a nih chuan semi-final an lut dawn a, an mualah an goal an veng a nih pawhin a mak lo ang. PSG paltlang a, semi-final an lut a nih chuan Barcelona thuneitute leh an club tantuten Xavi chelh tumin tan an khawh nasa zui hle ngei ang.
An mualah an tlawm tawh vangin semi-final lut thei turin PSG tan chak ngei ngei a ngai thung. Kylian Mbappe hovin chak ngei an tum dawn a, Barca tlahnung tan an tawrhhlelhawm khawp ang. Mbappe leh a khelhpui ten goal thun tumin tan an khawh ang a. Barcelona in goal thun bakah an goal venhim an tum dawn a, hei hi inkhel tihmuhnawmtu tur a ni. PSG tlarhnung tan pawh Robert Lewandoski leh Raphinha te pahnih ngawt pawh buaipui tham an ni ang. Barcelona leh PSG te inkhela chak zawk zawk hian Atletico Madrid leh Borussia Dortmund te inkhela chak zawk zawk an hmachhawn zui leh dawn a, final luh a harsa lo tura ngaih a ni.
Barcelona in semi-final luh tuma tan an khawh rualin La Liga club lian dang Atletico Madrid pawhin Borussia Dortmund paltlangin semi-final luh an tum ve dawn bawk. An mualah 2-1 a chak tawh Atletico Madrid hi Dortmund mual Signal Iduna Park-ah an lenglut dawn a, Bundesliga club lian lakah chak zawn turin hna hautak tak an thawh a ngai dawn.
Tarlan tawh angin UCL quarter-final second leg hi zanlai dar 12:30-ah khelh tan a ni ang.