Kartawp khan tualchhung football khelh chhunzawm a ni a, German Bundesliga chuan champion thar an nei a, Bayer Leverkusen chu tui let hnu lama a vawi khat nan an champion. Premier League lamah champion tuma inumna boruak a nung tha hle a, Liverpool leh Arsenal chak loh City in an chhawr tangkai. Kar tawpa football hnuhma langsar zual kan thlir kual ang.
- English Premier League
Inrinni zan khan champion lai Manchester City chuan 5-1 in Luton Town an hneh. Luton an sawp tum hian City forwawrd Erling Haaland chuan goal khat a thun a, Haaland hian season kal mekah goal 20 a thun tling chiah. City tan season hnih chin goal 20 thun thei pathumna a ni a. City tan season ruka goal 20 chin thun tling Sergio Aguero chu Haaland chungah a awm mek a. Haaland hian Carlos Tevez record a nih rual thung. Haaland hi Ruud van Nistelrooy hnu lamah EPL season hmasa pahniha goal 20 chin thun zawn thei hmasa ber a ni bawk.
Pathianni zan khan Aston Villa chuan champion tuma tan khawh Arsenal chu 2-0 in an hneh. Arsenal laka Villa goal hnihna hi minute 87-naa Ollie Watkins thun a ni. Watkins hian EPL season kal mekah goal 19 a thun tling tawh a, Villa tan EPL season khata goal thun tam ber Christian Benteke record a nihrual a, record thar siam theihna hun tha tak a nei.
Arsenal manager hlui Aston Villa manager ni mek Unai Emery chuan Emirates Stadium-ah chawhrualin khelh khata point 2.26 hmu zel ang a ni a. Emirates Stadium-ah point hmuh that lamah Arsene Wenger leh Mikel Arteta te chungah a awm.
- Spanish LaLiga
Inrinni zanah Atletico Madrid in Girona an hneh tumin Antoine Griezmann chuan goal a thun a, Griezmann hian La Liga-ah goal 186 thun tling tawh in, season kal mekah goal 12 a thun tlinna a ni bawk. France forward Griezman hian season kal meka inelna hrang hrang ah goal 21 a thun tawh a, La Liga player zingah goal thun hnem ber a ni.
Real Madrid a zawm tirh lamin chetha viau mah se Jude Bellingham a zuih chho tan a, goal nga chhung ngawt goal a thun lo zawn tawh. Bellingham hian Real Madrid tan a khelh hmasak vawi 20-ah goal 17 zet a thun a. A khelh hnuhnung vawi 14-ah goal thum chauh a thun ta thung.
- Italian Serie A
Inter Milan tan Marcus Thuram a chetha zel a, season kal mekah goal 11 a thun tawh bakah assist vawi 7 a nei tling tawh. 2004-05 hnu lamah Thuram hi Inter Milan tan goal 10 chin chunglam thun a, assist vawi nga chung lam nei thei pahnihna a ni a. 2009/10 season a Samuel Eto record (goal 10 leh assist 6) khum turin goal khat chiah a mamawh tawh.
- German Bundesliga
Tuilet hnu lama a vawi khat nan Bayer Leverkusen chu German Bundesliga champion an ni ta. A vawi khat nana Leverkusen champion puitu Xabi Alonso hming a dai leh tawh ngai lovang. Leverkusen an champion ve leh tak vang hian Bundesliga-ah club 13 an champion ta chiah a ni.
Leverkusen player pawimawh Florian Wirtz chuan season kal mekah goal 15 thun in, asssit vawi 15 a nei tling bawka kum 30 zet hnuah German player zinga hetiang tithei hmasa ber a ni.
German champion thar Leverkusen hi season kal meka inelna hrang hrangah an chetha viau a, khelh 43 chhung zet tlawm nei lovin an kaltluang tawh. Xabi Alonso hnuaia vul thar tak Leverkusen hi season kal meka inelna hrang hrangah vawi 38 zet an chak a, draw vawi nga an nei bawk a, Juventus record siam pahnih an nihrual.
Leverkusen hian Bayern Munich kawl lai Bundesliga trophy an laksak a, Bayern in Bundesliga record an siam an thaichhiatsak bawk. Bundesliga-ah vawi 11 zet champion zawn tawh Bayern hian 2013-14 season khan Bundesliga an khelh hmasak 28-ah tlawm an nei lova, Bundesliga record an siam. Leverkusen hi season tharah khelh 29 chhung tlawm an nei lova, Bayern Munich record khumin record thar an siam ta a ni.
- Messi- Ronaldo
Inter Miami tan Lionel Messi a khel tha thei hle. Messi hian 3-2 a Sporting KC an hneh tumin goal khat a thun a, assist a nei bawk. Inter Miami tan Messi leh Luis Suarez ten a vawi lina atan goal an thun ve ve. Messi leh Suarez te hian Barcelona tan an khelh dun hmasak ber 2014-15 season khan match khata goal thun ve ve vawi 13 zet an nei a. Inter Miami-ah record thar siam an tum dawn. Messi leh Suarez te hian season kal meka match tinah goal 1.1 an thawkchhuak ziah ang a ni.
Inter Miami lamah Messi a vul chhoh viau laiin Saudi Arabia lama khel Cristiano Ronaldo a reh lai a ni thung.