Aizawl : MNF party chuan thuchhuah siamin, dan lova Kuhva tawlh tihtawp tum ZPM sawrkar hnuaiah tihtawp chu sawi loh a hluar zel zawk a, man chhuah a tam rual hian man lohva kaltlang pawh tam tak a awm ngei a rinawm a ni. Hetianga a hluar zel avang hian Aizawl Bawrhsap, Nazuk Kumar chuan dt. 15.4.2024 Thawhtanni khan CrPc 1973, Section 144 tlawhchhanin thuchhuah a siam a, ‘Aizawl khawi hmunah pawh Danin a phal bak chin kuhva leh bungrua reng reng lakluh leh phurh phal a ni lo’ tiin a puang a ni, an ti.
Hun hmasa lamah khan Kuhva tawlh chungchangah ZPM hian sawrkar hmasa kha nasa takin an dem thin a, chutih rualin ngun zawka an zirin ZPM mi leh sa chu Kuhva tawlhah hian an lo inhnamhnawih ve a ni tih an hriatin, khatih laia an Working President, K. Sapdanga chuan, kuhva tawlhah kan mite an tel tih kan pha lo(29.1.2022@the zozam times) a lo ti tawh a. Kuhva tawlh chu tihrem a nihna tura an sawrkar chuan theihtawp an chhuah tur thu an sawi chamchi a nih kha, tiin.
Mipuiin an kuta thuneihna an pek tak hnu hian Kuhva tawlh hian rem lam aiin pun lam a pan zawk zel emaw ni tih turin, man thawm hriat tur a tam em em mai a. Sawrkar rawih Police mai ni lo, Civil mi thahnem ngaite pawhin an man ta zel mai a. Civil leh civil inkara hetiang thil a thleng chho ta zel hian sawrkar inthlahdahzia alantir a. Man an tam rual hian man lohva mit siai khum hi engemawzat a awm tel reng ang tih hi thil rinhlelhawm em em a ni. Mit siai khum bik an neih thin avanga tun thlenga Kuhva tawlh hi la hluar zui zelah MNF chuan a ngai a. Hun hmasa lama an mite inhnamhnawih an tihte kha an zalen ta em ni? An insawi ang ngeia tirem ngei turin MNF chuan ZPM sawrkar a phut tlat a ni, tiin an thuchhuahah chuan an tarlang.