#Zozam Times April 17: Lok Sabha MP inthlanna naktip, Zirtawpni-a neih tur atana campaign theihna hun chu vawiin tlai dar 5 khan a tawp ta a, hemi hnu lamah hi chuan campaign-na lam hawi reng reng khap vek a ni.

MP inthlanpui atana campaign theih hun a tawp tawh avang hian political party hrang hrang leh anmahni campaign puitute chu danin campaign chhunzawm a phal tawh lo.

Hemi rual hian media hrang hrang – chanchinbu, TV leh social media hmanga campaign, vantlang inkhawm buatsaih leh a huhova punkhawm te pawh phal a ni tawh lova. Hmun hrang hranga candidate te campaign puitu vote an neih lohna hmuna awm te pawh an campaign-na hmun an chhuhasan a ngai tawh a ni.

Tarlan tawh thin angin Election Commission of India chuan ram puma Lok Sabha inthlanpui neih tur hi March ni 18 khan a puang a, Lok Sabha inthlan hi thawh 7-a neih tur niin, Mizoram bika vote thlak chu a thawhkhatna April ni 19-a neih tur a ni.

Inthlanpui neih tur hriattirna hi March ni 20 khan tihchhuah niin, hemi atanga March ni 27 thleng inthlan chuh tumte tan hming pek luh theih hun hawn a ni a, hetih chhung hian mi 6-in inthlan chuh turin hming an pe lut a, inhnukdawk an awm lova, candidate 6 an awm.

Lok Sabha MP inthlan lo awm tura candidate te chu BJP Candidate Vanlalhmuaka, Indian National Congress candidate Lalbiakzama, ZPM candidate Richard Vanlalhmangaiha, MNF candidate K Vanlalvena, PC candidate Rita Malsawmi leh Independent Candidate Lalhriatrenga Chhangte te an ni.