- Ruata
Maruti Suzuki chuan an hatchback lar leh hralh kal Swift chu a chhuak thar hlak, a 4th generation model an tichhuak hnai a, thla thar ni 9 ah hian an tlangzarh beisei a ni.
Tunah hian booking an la tan lo na a Maruti Suzuki Arena dealership thenkhat chuan Rs. 11,000 chawiin order an la tan tawh a. He Swift thar tur nghakhlel tu leh lei ngei tum te an inlar chho mek a ni.
Swift thar tur hi a design, thil kentelah te danglamna kan hmu dawn a. Khawl pawh a thar hlak a rawn hmang dawn a, a hma aiin tui a heh lo fe dawn a ni. Hetihrual hian tunhnaia Japan a tlangzarh 2024 Suzuki Swift nena khaikhin chuan India rama chhuak tur hi a inang lo hret thung dawn a ni.
A thil thar neih tur langsar deuh chu a khawl thar hlak neih tur hi a ni a. 1.2L, 3-cylinder naturally aspirated Z-Series petrol engine (codenamed: Z12) chuan tuna a hman mek K-Series, 4-cylinder khawl hi a rawn luahlan tawh dawn a. A hma aia zang zawk, borual chhe pekchhuah kawnga khuahkhirhna thar ber zawm a nih dawn bakah CAFÉ (Corporate Average Fuel Efficiency) Phase 2 standard mil a ni dawn a ni.
He Z-Series engine thar hian a tui ti heh lo zual tûrin mild hybrid technology a nei tel maithei bawk a. Maruti Suzuki chuan new-generation Dzire compact sedan-ah pawh he khawl tho hi an rawn hman tir hmel a, hei erawh kumin tho, kum tawp lamah an tihchhuah hmel thung a ni.
2024 Maruti Swift thar tur hi Heartect platform khawih danglam nghahchhana duan a ni dawn a, tuna chhuak ai hian a sei zawk hmel a ni. A dung, a vang leh a san zawng hi a indawt danin 3860mm, 1695mm leh 1500mm te a ni dawn a. A hma aiin sei zawk mahse a vang leh san zawng hi a indawt danin 40mm leh 30mm in a tawi zawk dawn a. A chhung design hian Fronx compact crossover leh Baleno hatchback chhung design a rawn pawl ang a, dual-tone black/beige theme thar a rawn nei dawn a ni.
Swift thar tur hian kentel hrang hrang – 9-inch touchscreen infotainment system with wireless Apple CarPlay & Android Auto connectivity, Fronx-a mi ang a nei ang a. Heng bakah hian automatic AC, flat bottom steering wheel, analogue dials with MID, push button start stop, rear heater duct, reverse parking camera leh thil hrang hrang a rawn nei dawn a ni.
A man tur leh a chanchin kimchang hi kan hre thuai tawh dawn a. Hatchback car thar lei tum emaw Swift ngei pawh lei tum te tan chuan la nghah lawk chi a nih hmel a. Duhthlan tur rawn ti zau tur leh lei hmaa en chhin hmasak phawt a sual dawn lo viau niin a lang.