India rama inthlanpui neih a nih dawn mek laiin venhim hna thawktute chuan ram laili, Chhattisgarh-ah Maoist hel 29 zet an that.
He thil hi Bastar bul lawk, Kanker-a thleng niin hel tamna lai a ni.
State police chuan tun hnai kum eng emaw zat chhungin hetianga tam tum khata Maoist thah an nih vawi khatna a nih thu an sawi.
Chhattisgarh hi kum tak chhung chu Maoist-te helna hian a tibuai tawh a, mi retheiten dikna chanvo an hmuh theih nana bei niin an inchhal.
Bastar-ah hian inthlanpui thawh sarih neih tura a hmasa ber, Zirtawpni hian vote thlak a ni dawn a, Kanker-ah hian April 26-ah an thlak ve thung ang.
Venhim hna thawktute chuan Thawhlehnia inbeihna thleng hi thu an dawnah dan pawna awm mek, Communist Party of India (Maoist) hruaitute Kankar-ah an awm mek tih an hriat vang niin a sawi.
Zawn beihpui an thlak hnuah silai a puak zui ta a, Maoist hel 29 lai ruang an hmuh chhuah zui bakah an ralthuam tam tak an hmu bawk tih Bastar Inspector General of Police P Sundarraj chuan Nilaini khan a sawi.
Border Security Force (BSF) chuan an thah zingah hian CPI (Maoist)-a hruaitu lawk tak pahnih pawh an tel niin an sawi.
Union Home Minister Amit Shah chuan hlawhtling taka beihpui an thlak theih avangin venhim hna thawktute a lawmpui thu a sawi.
Shah hian kar tir lamah khan inthlan campaign-in Chhattisgarh hi a lo tlawh tawh nghe nghe a. Nilaini khan an sorkar chu ‘Maoist helin a tihbuai loh ram zalen’ a nih tawh thu a sawi.
Maoist helna hi West Bengal-ah kum 1960 chho tawp lamah intanin darh zelin India-a district 600-a hmun thuma thena hmun khat zetah an inzar phah.
Helho hian state eng emaw zat thununin ‘red corridor’ tia vuahin hmarchhak atanga India laili thleng an dap a ni.
Tun hnaiah sipai leh police-ten tan la nasain an tawmna ramngawah an luhchilh nasa a, hei hian nasa taka tihniamin tharum an thawhna thin pawh a tlahniam hle.
Hetih rual hian venhim hna thawktute nena inbeih erawh a la thleng fo va, kum tin mi tam tak thi an awm thin.