BJP leh an thawhpuite chuan Uttar Pradesh, Bihar leh Madhya Pradesh-ah an khingpuite an hnehsawh hle dawn niin opinion poll lak hrang hrangah hmuh a ni.
Heng state pathumah hian MP bial 149 a awm a, heng zinga 137 zet hi chu NDA lak tura ngaih a ni a. Hetiang hi a thleng tak tak a nih chuan kum 2019-a an dinhmun ang kha an tluk phak thuai dawn tihna a ni a. Inthlanpui hnuhnung berah khan Bihar-a bial 40 awmah 39 an la a, Uttar Pradesh-a bial 80 awmah 74 changin Madhya Pradesh-a 29 awmah biak 28 an chang phak bawk.
Bihar hian kuminah chanchin a nei hat a. INDIA dintu party zinga tel leh a phusa pawl, Chief Minister Nitish Kumar-a chuan a kaihhruai, Janata Dal (United) chu NDA-ah a kirpui leh thut a. Hei vang hian an state-ah hian INDIA chuan bial nga chauh an la phak tura ngaih a ni ta reng a ni.
Uttar Pradesh-ah hian Lok Sabha bial 80 a awm a, state zinga MP ngah ber an ni fal nalh a. INDIA hian he hmuna BJP leh a thuihhruaite hi chhut chah tumin an bei nasa a, opinion poll-ah chuah an hlawhhchham hmel a. Madhya Pradesh-ah pawh Congress chuan bial khat chauh la tura dah an ni bawk.