Inthlanpui neih tan mai tawh turah BJP chuan a vawi thum nan hnehna an chan leh ngei a rinawm a, NDTV-in opinion poll hrang hrang a thlirnaah erawh an au hla, ‘abki baar, 400 paar’ target tia an sawi, bial 400 la tling tura an beihna erawh an phak lo deuh dawn niin a lang.
BJP kaihhruai National Democratic Alliance (NDA) hian bial 543 inthlanah hian bial 365-ah hnehna an chan rin a ni a, Congress kaihhruai INDIA chuan bial 122 laiin bial 56 dang erawh heng tangho pahniha tel loten an la tura ngaih a ni.
Inthlan result tur thlir lawkna hi rin dan sa a ni deuh va, Prime Minister Narendra Modi-a hova a vawi thum nana sorkar leh tum, NDA hian chiang taka hnehna an chan rin sa a ni tlangpui a; mahse, kum 2019 aiin eptute nen MP an neih zat pawh an tihzauh rin sa a ni.
NDA-in bial 365 an la tura rin hi kum 2019-a an lak aiin 3.4%-in an la tam dawn tihna a ni a. Kha mi tum khan bial 353 (BJP bikin 303) an la a, Congress kaihhruai United Progressive Alliance-in 90 an la ve a ni.
NDA hi kum 2019 khan kum 2014-a bial 336 an lak aiin 5%-in an la tam zawk bawk a ni.
Kum 2014 leh 2019-ah khanBJP khingpui lian ber chu UPA niin kum 2024-ah hian INDIA a ni ta thung a. Kum 2014 khan bial 60 chauh an lak laiin 2019-ah khan hma an sawn hret a, 90 an la a, 50%-in hma an sawn a. Kuminah hian INDIA hian bial 122 an lak rin a ni a, 35%-in hma an sawn leh dawn tihna a ni ang.
Tun tuma NDTV-in opinion poll a lak khawmte hi pakua zet a ni a. Heng zingah hian December 25, March 12 leh April 16-a ABP-C Voter-in a lak te pawh a tel a. Heng pathumah hian NDA hian 295-335 atangin 366-ah an kai a, a hnuhnung berah 373-ah an kai ta hial a. INDIA erawh 163 atangin 156-ah tlain a tawpah 155-ah an tla a ni.
BJP leh a thawhpuite chet thattir bertu chu Times-ETG a ni a, bial 358 atanga 398 la turin a dah a. INDIA chuan 110-130 inkar la turin an ngai a. Heng pahniha tel loten 64-68 la turin an ngai bawk.
India TV-CNX, Zee News-Matrize leh Times-Matrize te pawhin NDA hian bial 350 chung lam la turin an ngai vek a, INDIA chu bial 100 pawh la tling lo turin an dah a. An zingah hian Times Matrize chauhvin bial 104 la turin a dah a ni.
Opinion poll laka tangho chi hnih inhnaihna ber chu India Today-C Voter-in voter 36,000 dawn hnena February 8-a a lak kha niin NDA-in bial 335 la tur leh INDIA-in 166 la turin an dah a. Party dangin 42 la turin a dah a ni.