- Rev. L. Rema (9862860181)
Vanglaini 1st Setpember, 2023 page 4 a tarlan angin China in Official MAP thar a siam chungchangah India chuan nasa takin a sawisel a, China Map thar hi India chuan a pawm ve loh thu an puang chu China Foreign Ministry thupuangtu Mr. Wan Wenbin chuan China Offical Map thar siam chu China Sorkar thiltih thin dan pangai reng a nih thu a sawi a.Dan anga kan rama thuneihna lantirna atan ti mai kan ni. India pawh chiai mai lova rilru zau tak pu chunga la thutak lutuk lo turin ka duh a ni, a ti a.
China hian an Official Map thar an siam chhuah ah hian Arunachal Pradesh chu China ram chinah a rin lut a. Tichuan National geographic Society Washington DC July 1991 a China map an siam ah pawh, Arunachal Pradesh pumpui hi Boundary claimed by china tiin Pentui senin an mark vek tawh a ni. Brahmaputtra lui dung Tezpur atanga lui hnar lam tawai thleng miles 500 chuang lai athui an claimed tawh kha a ni. Ni 30 August, 2023 khan “National Mapping Awareness Publicity Week” an hman naah official map thar 2023 edition of the standard chu an tlangzarh a. Arunachal Pradesh pumpui leh AKSAL chin area te chu an ram chhungah an rinlut a ni. Offical Map tharah hian 2023 April thla a an lo puan tawh Arunachal Pradesh a khaw 11 hming an phuah te pawh tarlan a ni a; heng khaw 11 hming an phuah zingah hian Arunachal Pradesh khawpui Itanagar khaw bul ami pawh a tel a ni.
Kum 2023 China Official Map thar an tihchhuah hi Ministry of Natural Resources (MNR) siam a ni a. Hemi Official Map thar an siam rual hian digital Map an buatsaih nghal tur thu an sawilang bawk.
He China Official Map thar an tihchhuah chhan a lang chu BJP India Leadership hnuaiah India in G20 Summit a thleng tur duhloh dodalna niin Senior Politician tam tak te chuan an ngai a. Chutiang chuan China President Xi Jinping chu G20 Summit ah hian tel a tum thung. Kumin 2023 hi People’s Republic of China Communist hnuaia Law of Surveying and Mapping din kum 30 na Anniversary kum a ni a; He dan hian survey bakah Maps siam leh enkawl chungchangah China Sorkar tha tichak tura siam a ni. China President Xi Jinping hian kum 2022 khan Border Law thar siamin ramri enkawlna kawngah khauh leh zualin thil a kalpui a. An ram chhunga khua leh hmun hming tihdanglamna Article 7 hnuaiah dah a ni a; Tin, Article 22 hnuaiah China sipai te chu ramri bulah drill nei thin turin order a pe bawk a ni.