United Arab Emirates leh a thenawm ramahte ruah nasa tak a la sur chhunzawm avangin Dubai airport chu hna ala thawk mumal thei lo hle.
Ruah hi nasa takin Thawhlehni khan UAE-ah hian a tla a, kawngpuiah tui lianin international airport lun tak hmun thenkhat pawh tui hian a chim nasa hle.
Tui lian thut avang hian Oman-ah mi 20 thi an awm tawh a, UAE-ah pakhat a thi bawk.
Ningani khan thlawk lut turte chu an luhtir tan leh tawh a; mahse, miin an pan khawm nasat tak, Dubai international airport hi dan pangngai ang tak chuan a la kal lo nasa hle.
Khawvela thlawhna tumhmun lun ber pahnihnaa thuneitute chuan Ningani khan Terminal 1-ah thlawk lut lam an dawngsawng leh tan tih an sawi a, he terminal hi ram dang atanga bungraw phurte luhna bik niin ram pawna chhuak tur lam erawh tihkhawtlai rih a la ni zel.
Ningani hma takah khan X-ah thuneitute chuan zin turte chu an zin chhuak dawn ngei tih a chian hnuah chauh tumhmun pan turin an ngen.
Dubai airport hotu, Paul Griffiths chuan, “Hun khirh tak a ni rih mek a. Mihring dam chhungin hetiang hi chu miin an tawng mang lo vang,” a ti.
Tumhmun chhehvel kawngpuite pawh tumhmun pan tum an tam avangin a tawt hle bawk.
Nilaini khan thlawhna 300 chuang an thlawk tur thulhtir an ni a, za chuang an thlawh hun tur tihkhawtlaisak an ni bawk.
UAE hian ruahtui tla zat an chhinchhiah hnu, kum 75 chhunga ruah an dawn tam ber a ni tih thuneituten an sawi a. Thawhlehni atang khan ram ro tak nia hriatah hian ruah mm 259.5 zet a sur niin an sawi.
British khualzin, a pasal leh a fate pathum nena London Heathrow pan tum, Anne Wing-i chuan, “A rapthlak a, ramsa ang maiin kan inhawr khawm tuau tuau va, a hlauhawm a, mihring khawsak dan ang pawhin kan khawsa meuh lo a ni,” a ti.
“Passenger-te chu an te chel chul a, thenkhat chuan connection desk lamah an pan a, tumah staff erawh hmuh tur an awm lo,” a ti.
An chhungkua hian chhunchaw an fak bak engmah an la ei lo niin a sawi a, ei leh in tur an dawn chhun chu ‘caton tereuh te tui’ chiah a nih thu a sawi.
Airport thuneitute chuan thawktute chu passenger tangkhangte hnena ei leh in tur pe turin kawng chu tuiin a chim vek avangin an che thei bik lo niin an sawi thung.
Passenger tangkhang thenkhat chuan social media-ah an thinrim thu an au chhuahpui hlawm a, information pe chhuak zung zung tura an duh thu an sawi hlawm.
Thenkhat, naupang nena zin, ‘thinrim zual’ phei chuan ticket an book tih finfiah vek theih si, a ticket ber engmah buaipui (process) zui awm lo a awm niin an sawi a, ‘check-in/bag drop/passport control te chu a inhawng lo’ niin an sawi.
Dubai airport hian kum khan passenger maktaduai 80 chuang dawngsawngin Atlanta, United States dawta ngah ber an ni a, dan pangngai ang ni tur chuan ‘hun a la duh deuh dawn’ tih an sawi.
Ruah a la sur chhunzawm avangin Nilaini zanah khan Dubai lailiah chuan kawngpuiah tui lianin lirthei a len nasa hle a, hmun tinah traffic a jam bawk.
Thuneitute chuan ruah, tek, rial leh thli na tak la thawk thei niin an sawi lawk a. Oman-ah chuan hmum himah mi 1,400 chuang suan chhuah an ni tawh a, sikul leh sorkar pisate chu khar a ni.
UAE state news agency chuan President Sheikh Mohammed bin Zayed Al Nahyan-a thusawi tichhuakin thuneituten thil chhiate an en chiang mek a, a tuartu chhungkuate chu a theih ang angin puih an ni dawn tih a sawi.