BTS star Kim Taehyung (V) chu military service a tan lai lem leh sipai fakna lam thila inlan dan ah faktu awm bawk mah se tul ti lo leh nasa taka sawisel an tam.
Thlalak darh hluai ah V hi special black uniform ha in, SDT (Special Forces) ho hak angin a in thuam hian fan te zingah sawi neuh neuh leh thupui hlapui vai hluai a ni chho ta.
A thlalak te hi internet-ah kangmei chhuak nasa tak ang maiin a darh chum chum mek a, BTS star inbel dan hi sipai tha bik (elite unit) ho hak ang chiah kha a ni em, tih ah te thu inchuh a nasa viau mai a, elite unit-a tel thei an nei chu fan tam tak lawmah tla ve bawk mah se, heti anga milar hi sipai ho ‘propaganda’ pakhata hman a ni chu tul ti lo an tam hle a, Chuncheon hmuna inbun 2nd Army Corps ho fakna video hi sipai chawi vungna ah ngaiin, fan te zingah ngei pawh pawm thei lo an tam.
He youtube video hi April 17 khan dahchhuah a ni a, V hi ralthuam famkimi nena inbelin, expert ang maia silai a hmetpuak zawt zawt lai te a lang.
Fan tam takin, ‘super cool’ an tih mek laiin, inchhuanna tur emaw intihtheihpuina tur pakhatmah a awm lo, ti zawnga tang tlat pawh an awm.
South Korea ram dan khauh takin mi pangngai chin mipa tawh phawt sipaia tan ngei ngei tur tih dan hnuaiah V hi a lut ve a ni mai a, heti anga tihluihna hmanga sipaia intantir leh an propaganda ang mai maia V-a hman a ni chu hrethiam thei lo leh thinrim fe fe pawh an tam.
He thlalak leh video hi tunah hian social media-ah BTS fan te mai ni lo, K-pop ngaina a, atchilh tute zingah inhnialna chawtui ber pakhat ni mekin, thu in chuh a nasa in, fan te hi an tangulh ti tih a ni ber mai awm e.