Ningani zan khan Europa Conference League quarter-final khelh zawh a ni a, EPL club Aston Villa chuan penalty shoot-out hmangin Lille an hneh hram a, semi-final an lut. Penalty-ah an chak tum hian France mipui te huat rawn Emilliano Martinez a chetha hle a, Villa a chakpui.
Villa hian an mualah 1-0 in hnehna an lo chang tawh a, hnehna chan nawn leh tumin Lille mual; Decathlon Arena-ah an lenglut. An len luhna mualah an tlawm teuh hle. Lille tan hian Yusuf Yazici chuan minute 15-na lekah hmahruaina goal a thun a. Benjamin Andrére chuan minute 67-naah an goal hnihna a thun leh a, si belhkhawmah hma an hruai let ta chiah.
Hnufual zawk an nih hnuin Villa hian goal thun tumin tan an khawh a, hun tawp dawn hnaihah an hlawhtling. Matty Cash chuan minute 87-naah goal thunin an si phurh a sut. Hun pangngai leh extratime-ah goal a luh belh thei lova, penalty shoot-out hmangin semi-final lut tur chinfel zui a ni. Penalty-ah hian Aston Villa si nghak Emilliano Martinez chuan save vawihnih a nei. French mipuite huat rawn Martinez hi a chetha leh pek hle.