April 18, Ningani zan khan UEFA Europa League quarter-final khelh zawh a ni a, Liverpool leh West Ham United te semi-final lut zo lovin an tla. Liverpool leh West Ham an tlak leh tak vangin Europe khawmuala football club te inelna lian Champions League leh Europa League atangin English club te an tla vek a, English club te kum chhiat kum a ni.
- Liverpool an chak, mah se..
English club lian Liverpool chu Atalanta hmachhawn turin Gewiss Stadium, Italy-ah an leng lut. Mikhual an nihna mualah Reds hian Mohamed Salah goal thun hmangin hnehna an chang. Atalanta mualah chak bawk mah se an muala an khelhchhiat an tuar a, semi-final lut zo lovin an tla ta tho thung. Trophy lian pathum nen an manager Jurgen Klopp thlah an tumna chu mang ramah a thamral zo ta a ni.
Europa League-ah Liverpool hi champion tura rinkai ber an ni a, quarter-final-ah Atalanta an hmachhawn dawn vangin semi-final lut ngei tura ngaih an ni. Quarter-final first leg-ah mikhual team buaina thin Anfield-ah an inkhel a, mak tak maiin Liverpool hi an mualah ngei si thum fai ngawtin an tlawm teh tlat. An mualah si thum faia tlawm tawh an nih vangin mimualah inlehthalna thlentir turin thil mak an tih a ngai. Ningani zan khan thil mak thlentir tum viau mah se goal khat bak an thun thei lo.
Semi-final luh beisei chhunzawm turin si thum fai tala chak mamawh Liverpool hian Atalanta lehthal tumin Italy ramah tan an khawh nasa hle. Chak an tum ngawrh bawk a, goal pawh an thun hma hle. Inkhel tan atanga minute sarihna lekah Reds hia penalty an hmu. He penalty hi Mohamed Salah chuan harsatna tawk lovin a pet goal a, hmahruaina goal a thun. Hma taka goal an thun vangin Liverpool an phur viau a, goal thun belh tumin an khingpuite an nawr zui nasa hle. Goal thun belh tum viau mah se tlarhnung phui tak Atalanta an paltlang thei tawh lo va, hun tawp thlengin goal an thun belh thei lo. Second leg-ah 1-0 in chak mah se Liverpool hi si belhkhawmah 3-1 ngawtin tlawm zawkah an tang a, Europa league atangi an puanthuah an tel zui ta a ni.
Liverpool hnawkchhuaktu Atalanta hi Italian Serie A-ah parukna an ni mek a, hmahruaitu Inter Milan aiin point 32 zetin an hniam zawk mek. Serie A lamah che ropui lo viau mah se Europa League-ah erawh an chetha viau thung. Liverpool meuh an hnawhchhuah tak vangin Italian club lian champion turin rin an kai sawt hle nghe nghe a ni.
- West Ham pawh an tla
Europa League atanga Liverpool an tlak rual hian London club West Ham United pawh German champion thar Bayer Leverkusn in an hnawtchhuak ve bawk. Nilai zan khan UCL atangin Manchester City leh Arsenal an tla a. Ningani zanah Europa League atangin Liverpool leh West Ham an tla ve leh bawk a, EPL club tan kar duhawm lo tak a ni.
West Ham hi Leverkusen nen an inkhelh hmasak tumin 2-0 in an lo tlawm tawh. An mualah hnehna changin, German champion lehthal ngei tum mah se an hlawhtling zo lova, 1-1 in an inhnehtawk. Hammers tan hian Michail Antonio chuan minute 13-naah hmahruaina goal a thun a. He goal hi minute 89-naah Jeremie Frimpong chuan Leverkusen tan goal thunin a sut a, 1-1 in an tin a. Xabi Alonso enkawl Leverkusen hian si belhkhawmah 3-1 in hnehna an chang a, semi-final an lut.
- Result dang
Ningani zana inkhel dangah Serie A club lian pahnih; AS Roma chu AC Milan lakah an chak nawn leh a, semi-final an lut. Roma hian Milan mualah 1-0 in hnehna an lo chang tawh a, an intum nawn lehnaah 2-1 in hnehna an chang zui leh bawk.
Inkhel dangah French club Marseille chuan Mimualah 2-1 a an hneh loh Benfica chu an mualah 1-0 in an hneh. Si belhkhawmah 2-2 a nih vangin penalty shoot-out hmangin semi-final lut tur zawn chhunzawm a ni a. Mualneitu Marseille chuan 4-2 in hnehna an chang ta a ni.