Wimbledon champion hlui leh World No. 1 hlui Garbine Muguruza chuan kum 30 mi chauh ni chungin Tennis a chawlhsan thu a paung.
Venezuela a piang, Spain a seilian Muguruza hian kum 2012 atang khan Professional Tennis a luhchilh tan a, professional Tennis a luhchilh atanga kum li hnuah inelna lian Grand Slam-ah a champion. 2016 khan French Open final-ah Serena Williams a hneh nawlh a, a vawi khat nan Grand Slam-ah a champion. Hemi kum vek hian Wimbledon final-ah Venus Williams a hneh zui leh a, Grand Slam pali zinga ngaihhlut hlawh ber Wimbledon-ah a champion a, World No. 1 a ni zui nghal bawk. Wimbledon-ah hian kum 2017 khan a champion zui nghe nghe.
Inelna hrang hrangah chetha pawl tak niin title 10 lai la bawk mah se hliamin a tibuai a, player thar tha tak tak an lo awm thar bawk nen Spanish nula pian nalh tak Muguruza hian a tawp thlen a harsat a, Grand Slam-ah a champion tawh lo. Hliam in a tihbuai vangin January 2023 hnu lamah inelna a hmachhawn zui ta miah lo. Inelna hmachhawn tura a kir leh ngei rin a nih laiin Tennis a chawlhsan thu a puang a, Tennis khawvel chu a mangtha ta a ni.
“Kum 25 liam taa Tennis ball ka vuak ve tantirh lai khan tu emaw in Professional Tennis player ka nih tur thute, French Open leh Wimbledon champion ka la nih tur thute, World No 1 ka nih hial thute bakah WTA Finals champion ka nih tur thute min hrilh ni ta se, chumi ngei chu ‘hemi hi a a hlawm tawp a nih hi a’ ka ti ngei ang.
“Tennis hian ka tawn phak ngai loh tur tam tak min tawntir a, ka nuna peng pawimawh tak a ni. Kei ngai pawhin ka rin phak loh khawpa thain hun ka hmang a, Grand Slam champion leh World No 1 hialte ka ni a. Ka Tennis zing kawng hi tluang angin lang vek lo mah se ka tan chuan hun ropui a ni a, hun chhinchhiahtlak a ni. Hun her zelin a herchhuahpui chu Tennis chawlhsan a lo ni ve ta reng mai, Tun hi ka tan chawlhna hun tha a ni,” tiin thu tlukna dik siam chunga chawl a nih thu Muguruza hian a sawi.