Pathianni zan khan English Premier League khelh chhunzawm a ni a, EPL leh Europa league lamah result tha lo an neih zawn hnuin Liverpool in result tha an nei ve leh ta a, Craven Cottage-a an khingpui Fulham chu 3-1 in an hneh. Liverpool rual hian Aston Villa pawhin hnehna an chang ve bawk.
Craven Cottage-a lenglut Liverpool hian hnehna chan ngei tumin tan an khawh a, inkhel tan phat atangin an khingpuite na takin an nawr nghal. Goal thun tumin hlauhawm siam thin mah se beisei angin goal an thun hma lo thung. An hun tha an hlah zawn hnuin Reds hian free kick an hmu a, Trent Alexander-Arnold chuan top corner-ah mawi zetin a pet lut a, minute 32-naah hmahruaina goal a thun. Liverpool hian Arnold goal thun hi chawlhlawk hmain an venghim thei bik lova, chawlhlawk dawn tep-ah goal an chhuah. Fulham tan hian minute 45+2-ah vanneihthlak ang reng takin a pet goal a, an si phurh a sut.
Chawlhlawk hnu lamah inkhel a hmuhnawm chhunzawm a, Liverpool in goal hnih an thun belh. Second half tantir minute 53-naah Ryan Gravenberch chuan Elliott hnen atanga ball a hmuh a khalh rem hnuin box atangin fuh zetin a pet kual lut a, hma an hruai nawn lehna goal a thun. An mualah an hnufual nawn leh hnuin Fulham hian an si phurh sut tumin tan an khawh nasa viau naa an hlawhtling zo tawh l An si phurh an sut thei lo a ni mai lova, goal an chhuah belh leh ta zawk. Diogo Jota chuan fuh taka ball a khalh luh hnuin a pet goal a, minute 72-naa goal thunin an hmahruaina a tizau. Jota goal thun hnu hian goal dang a luh belh thei tawh lova, Liverpool chuan 3-1 in hnehna an chang zui ta a ni.
Fulham laka chak Liverpool hian khelh 33 atangin point 74 an hmu a, hmahruaitu Arsenal nen an point hmuh a inzat mek a, goal diference-a an chhiat zawk vangin Reds hi pahnihnaah an awm. Pathumnaa awm mek Manchester City chu Arsenal leh Liverpool te aiin an khel tlem zawk a. Point khata hmahruai thei dinhmun ah an ding mek. EPL-ah hian champion thei team pathum an awm mek a, champion tuma inum boruak a ngaihnawm hle a ni.
Liverpool an chak rual hian palinaa awm mek Aston Villa chu an mikhual AFC Bournemouth lakah 3-1 in an chak a, palinaah an insawh nghet.
Aston Villa hian Villa Park-a an mikhual Bournemouth lakah goal an chhuah hmasa a, Dominic Solanke chuan minute 31-naah penalty atangin mikhual team hmahruaina goal a thun. Goal chhuah hmasa zawkah tang mah se Morgan Rogers chuan chawlhlawk hmain an si phurh a sut a, chawlhlawk hnu lamah Moussa Diaby leh Leon Bailey ten Villa tan goal an thun leh a, an mualah 3-1 a hnehna changin, point thum hlu tak an hmu a, UCL an hnaih deuh deuh zel.
Pathianni zana inkhel dangah him hram tuma tan khawh pahnih; Everton leh Nottingham Forrest te an inkhel a, Everton in an mualah si hnih faiin hnehna an chang. Everton tan hian Idrissa Gueye leh Dwight McNeil ten goal an thun a, an mualah point thum hlu tak an hmu a, him an hnaih zel.
Pathianni zan hian Crystal Palace in West Ham chu 5-2 in an lo hneh ve bawk.