Mizo Zirlai Pawl (MZP) chuan thuchhuah siamin, Pathianni tlai dar 5:00 vela Durtlang North-a kan zirlai pui Lalawmpuia kum 12 mi, Border Security Force (BSF) Motor-in a sut hnu lawkah a boral chu pawi a ti hle a. He thil thlenga mawhphurtu chu a phutawk hremna pe tur leh vanduaina tawkte chhungkua zangnadawmna pe vat turin a phut a ni, an ti.
MZP chuan Lalawmpuia kum 12 mi, tuna Govt. Durtlang Middle School-II a pawl 6 zirlai thihna hi pawi a tiin, a kalsan tak a chhungte a tuar pui tak zet a. He vanduaina thlentu Border Security Force (BSF) Motor-in kan zirlaipui a sut hnuah, buaipui zui miah loa a tlan chhe zui hi MZP chuan a hrethiam lo hle a. Hetiang thil hi thleng nawn tawh lo se MZP chuan a duh takzet a ni, tiin.
MZP chuan Mizoram chhunga Security Force awmten, an awmna hmun a zira insiamrem a, Mizo mipuite zah turin a ngen nghal a. Tuna vanduaina thleng pawh a tuartute zangnadawmna tha tawk tak pe turin BSF hotute a ngen nghal a ni, tiin an thuchhuahah chuan an tarlang.