Nimin khan BJP Mizoram State Office, Upper Republic ah karthar inhlanna leh Political Session neiin, Vanupa Zathang IPS (Retd), State Vice President-in inkhawm a kaihruaia, VL Awia State Secretary-in Hunserh hmangin, Vanlalhmuaka, State President-in thusawina hun a nei bawk.
Vanlalhmuaka chuan, “MP inthlan kan hmachhawn chu tluang takin kan hmang zo thei ta a, Party Member tinte ṭhahnem ngai taka thawktute avangin hnehna kan chan ngei a rinawm a ni,” a ti.
Hmuaka chuan, “India ram hmundang ah Election hi kalpui mek a la ni a, chung hunah te chuan INDI-Alliance lam pawhin in hamtan hram hram tumin hma an la ve mek a, nimahsela an thil tum erawh Result in a rawn hailang dawn a ni. BJP leh a thawhpuite chuan party dang sawichhiat ngawr ngawr hi kan thupui a ni ve lo a, Congress leh a thawhpui INDI-Alliance tihdan ang lo takin dawt hmangin emaw party dang chhiatna lai khei vak hi kan tihdan a ni ve ngailo, mi tinin an mamawh ang hmasâwnna an hmuh ve hi kan tum a ni a, kan manifesto neihte mipui tan malsawmna a nih theih nan tih hlawhtlin tumin hma kan la mai ṭhin zawk a ni,” a ti a.
Hmuaka chuan sawi chhunzawmin, “Mizorama BJP te hi Missionary hna thawk kan ni tih kan inhriat angai a, Mizoram Kristian ram kan intih ang hian kan hnathawhna ah te, Sorkar hna kan thawhna ah te, kan rinawm a ngai a, Pathian thu hi sawi nilovin kan nun ah a lang tur a ni. Central hruaitute khuan keimah ni aṭanga Krista hmel hmuh an duh hle a, nimahsela kan hnathawh Result aṭang hian kan nihna dik tak erawh an hmu ṭhin thung a ni. Chuvangin Politics hi Pathian rawngbawlna ani tih kan hriat a, Ram rawngbawlna kalkawng a ni tih kan chian a angai a ni. BJP Mizoram chuan chu chu hre thar leh ila, Midang tana malsawmna ni zel turin hna thawk zel ang u,” a ti bawk.