April ni 17 atanga ni 22 chhung khan Mizoram hmun hrang hrangah ruah sur nasa, thlipui thawk leh rial tla avangin chenna in tam tak a chhia a, chhiatna thleng avangin mi pakhatin hliam a tuar.
Disaster Management & Rehabilitation Department in an chhinchhiah danin, April ni 18 leh ni 19-a thlipui thawk avangin Khawzawl district chhunga Tualte khuaah Biak in pahnih a chhia a, New Chalrang-ah pawh chenna in pakhat chu luah tlak lohin a chhe vek bawk a. April ni 21 tlai khan N. Tinghmun-ah thlipui thawkin chenna in 3 a chhia a, hemi ni veka Ratu khuaa thli thawkin chenna in 2 a ti chhe bawk.
Inrinni tlai khan East phaileng khuaah rial nasa taka surin chenna in 122 vel in chung rangva a deng chhia a, in 8 chu in chung zawng zawng thlak ngai khawpin rial tla hian a ti chhe hneh a ni. East Phaileng VCP hnen atanga thu dawn danin, Inrinni tlai hian ruah a sur a, rial tlem a tla tel a, a hnu ah ruah hanin rial lawngin a sur ta vak a ni. Pathianni khan Biak In kharin In chung pawp thawm hnatlang neih a ni a, niminah chhunzawm a ni.
East Phaileng bul Pehlawn khuaah pawh rial tla hian In 48 a deng chhia a ni. Khawtlang in chhiat an tawh na ah hian khaw thenawm V/C leh leh YMA ten tanpuina eng emaw zat an pe a ni.
Inrinni tlai a Kolasib leh a chhehvela Thli leh rial thawk avangin Inchung chhia 235 chuang awmin, luah tlak loh khawpa chhia pakhat a awm a, hei bakah hian tunkar April ni 25-28 chhunga UPC NE India General Conference thlenna tura Kolasib vengthara Pandal an sak zawh tawh chu a chim bawk a. Kolasib chhung bika mi hi in 135 niin Thingdawlah in 100 a deng chhia a ni. Kolasib Dist a in chhia 222 te hi pucca building a thenkhat chhia niin a bakah hian kucha building 1 chhe vek leh 1 a thenlai chhia a awm a, SIRD Quarter chhia 4 leh anganwai centre 1 bakah 1st IR Barck a thenlai chhiate pawh a awm a ni.
UPC NE India General Conference neihna tur Pandal chhia senghawi hna hi pathianni khan thawh a ni a, Kolasib khawpui chhunga kohhran hrang hrang atangin mi thahnemtak an hnatlanga a, Pandal chhia hi nimin atangin sak that hna thawh chhunzawm leh nghal a ni a, khawmpui hi a hun taka tan thei turin an peih theih an beisei thu UPC Kohhran hruaitute’n an sawi.
Thawhtanni tuk khawvar hmaa thlipui thawk in Falkawn khuaa Pu Lalhmudika te chhungkaw chenna in chu a len chim a, Vaivakawn Aizawlah thingkung tlu in car a delh chhia a, Tlungvel khuaah in 2 leh central jail vangin 1 chu thlipui thawkin a ti chhe bawk a ni.
Tunhnaia ruah sur, thlipui tleh leh rial nasa taka thawk avanga in chhia hi a vaiin 476 a tling a, chhiatna thleng avanga damdawiina dah luh ngai mi pakhat awmin, nunna chan erawh an awm lo a, thingkung in electric hrui a tih chhiat avangin tui pump te pawh a khaihlak phah a ni.