- Ruata
Honda Motorcycle and Scooter India chuan an scooter lar leh India rama scooter hralh hnem ber Activa chu electric hmang tihchhuah an tum a, kumtawp lamah a chhuah beisei a ni.
Honda Activa hi India ramah chuan a larin scooter hralhchhuah tam ber a ni a. State thenkhatah chuan keini state in he lirthei huang ‘scooty’ tia kan sawi ang mai hian heng scooter ho sawina atan hian ‘activa’ tih an hmang hial! Heti khawpa lar scooter hi tuna India rama sorkar khuahkhirhna hrang hrang avanga lar chho mek electric lirthei huangah kan hmu chho ve dawn a ni a. Market lamah pawh a rawn chet that viau a beiseiawm a ni.
Honda Activa EV hi kumin kumtawp lamah phochhuah beisei a ni a, lei theih tura tlangzarh pumhlum erawh nakum kum tir lam a nih hmel thung a. Honda Activa EV hi a lo chhuak a nih chuan tuna electric scooter lar, mawi leh chak tha Ather 450X te nen pawh market lamah a inel ngei hmel a. Tun dinhmunah Honda Activa EV chanchin kimchang, a nihphung, kentel leh chak zawng tur hi hriat theih a la ni lo a ni. Tunah hian duan mek a ni a, a codename pawh K4BA an vuah a ni.
Hriat theih chinah Honda Activa EV Platform E nghahchhana duan tur a ni a, hei hi Honda electric scooter lo chhuak tur reng rengin a hman chhoh tur a ni dawn a ni. Japanese two-wheeler company lar Honda hian electric scooter thar atan patent pawh an file tawh a, hetah hian a fixed battery, electric motor, controller, charger, leh adang mamawh tur hrang hrang pawh kimchang takin an ziak tel tawh a ni.
Activa EV bakah hian Honda Motorcycle and Scooter India chuan electric hmang two wheeler thar pawh an ruahman mek a, battery thleng zung zung theih tur chi a ni dawn a, battery phai tawh chu ramchhunga battery swapping stations 6,000 vel an ruahmanah charge full sa in a thleng zung zung theih dawn a nih hmel a, hei hi thil tha tak, electric hmang scooter emaw bike emaw nei tana tangkai tak tur a ni.
Electric hmang two wheeler pual liau liau hian Honda chuan a siamna tur hmun bik, Factory ‘E’ chu Narsapura facility Karnataka-ah an bun a. Kum 2030-ah chuan electric hmang two wheeler million 1 (nuai 10) siamchhuah hman an tum a ni.