Nilai zing khan NBA Play-off khelh chhunzawm a ni a, New York Knicks lakah vawi thum tlawm tawh Philadelphia 76ers chuan hnehna an chang a, semi-final luh beiseina an la nei. Nilaini zinga inkhel dangah Milwaukee Bucks chuan Indiana Pacers an hneh a, semi-final luh beiseina an nei thar ve bawk.
Semi-final luh beisei chhunzawm thei tura chak ngei ngei mamawh 76ers hian New York Knicks lakah bul an tan tha a, quarter hmasa berah point 9 in an chungnung nghal. Bul tan tha viau mah se quarter hnihnaah Knicks er let an tuar lova, point 15 zeta hnufualin, an hmahruaina an hloh chiang hle. Vawi thum chak tawh Knick hian point ruka hmahruai chungin chawlhlawk an hmang a, semi-final an hnaih hman hle.
Tlawm hleka tla thei an nih vangin 76ers in chawlhlawk hnu lamah tan an khawh chiam a, a khingpuite an lehthal ta hial. Quarter thumnaah point ngaa chungnungin an inkar an tizim phawt a. Quarter linaah point khata chungnungin hun pangngaiah chak zawk awm lovin an inhnehtawk.
Hun pangngaiah chak zawk an awm theih loh vangin overtime khelh chhunzawm a ni. Overtime-ah hia 76ers an khel tha a, point 15 an thawhchhuah laiin Knicks in point 9 an thawkchhuak ve thung. Inkhel pawimawh takah Philadelphia 76ers chuan point 112-106 in New York Knicks an hneh a, semi-final luh beiseina an la nei chhunzawm. Inkhel hmuhnawm takah tlawm mah se Knicks hian series-ah 3-2 in hma an hruai a. Khelh hmabak pahnih an la neihah semi-final lut turin vawikhat chak chiah an mamawh tawh. Knicks an hneh tum hian 76ers tan Tyrese Maxey chuan point 46 zet a thawkchhuak.
Play-off game hmasa pathuma tlawm zawn tawh Milwuakee Bucks hian semi-final luh beisei zui turin game linaah chak ngei ngei an mamawh. Chak ngei ngei an mamawhna inkhelah point 115-92 in hnehna an chang a, play-off game liah a vawi khat nan an chak. Hliam vanga an player pawimawh pahnih; Giannis Antetokounmpo leh Damian Lillard chhawr thei lo Bucks tan hian Khris Middleton leh Bobby Portis ten point 29 ve ve an thawkchhuak.
Eastern Conference lama inkhelah Cleveland Cavaliers chuan an khingpui Orlando Magic chu point 104-103 in an hneh thei hram a, Series-ah 3-2 in hma an hruai.