Tun hnaia Union Home Minister Amit Shah thusawi ang ni lo va social media-a post darh awm chungchang chhui chiang turin BJP Mizoram chuan Ningani khan Mizoram IGP hnenah FIR an theh lut.
BJP Mizoram chuan Central hruaitute’n an hriattir angin, Union Home Minister Amit Shah thusawi la kawi a, BJP tih hmingchhiatna tur atana post darh a ni chu pawi an tih thu an sawi a. Hei mai ni lo vin, sakhuana thil a thudik lo hmanga beihna BJP hian tawk chamchi bawk a, FIR theh luh thin a ni a. Tunah erawh Central thurawn anga chak zawka hma lak a nih theih nan State Police hotute hnenah FIR theh luh a nih tak thu an sawi.
BJP Mizoram chuan political party an nih angin politics-a inbeihna hrang hrang chu tawk tur a ni tih an pawm a; amaherawh chu, dawt hmang leh sakhuana hmanga mipui rilru la kawi thei zawnga beihna erawh dan anga hrem an nih zel theih nan leh thudik hailan a nih a, Mizo mipui te’n rin tur leh zui tur dik an hmuh leh hriat theih nana political party te pawh mipuite hnenah thu sawi thin turin an ngen a ni.