- Dr. C. Lalrampana
A KAMKÊUNA
Kan Zoram zimtêah hian Social Media platform pahnih khatah tuemaw an han lâr deuha vantlang tana thawktu ‘Social Activist or activism’ ang hrimin title kan pe chawp mai thin emaw tih mai turin hahipin kan sawi a, kan vawrh lar a. Anmahni lah hian tak tak emaw an inti a, an inngaisangchawp ta hluai thin nite pawhin a ngaih theih. Esopa thufing tawia choak ârâwn chang tawnte pawh kha kan ang zo ta. Mahni phu loh chawimawina, nihna vuahte hi kan lâwm tlang phian a nih hmel. Kum hnih khat kal ta atang khan Social Activist hi an pung ta hluai emaw tihtur a ni. Chuvangin, he nihna hlu tak leh dinhmun zahawm tak hi enge a nih I han bel chiang teh reng ang hmiang.
SOCIAL ACTIVIST AWMZIA
Oxford dictionary-in a sawi dan chuan social activist hi “politics emaw, khawtlang nun emaw inthlak danglamna thlen tura thawktu, a bik takin thil tum bik nei pawl member anga thawktu Activist a ni” tih a ni. ‘Social Activism’ emaw Social Activist tih hian a ngaih pawimawh ber tur chu khawtlang nun a ni a. Social Activist pakhat hian thil tam tak Child labor, Universal right to education leh Child abuse etc. te hi a ngai pawimawh lehzual tur a ni. Thil awm dan anga hnawl emaw pawm emaw duh lohna, Inspiring, social speaker tha tak nihte hi social activist-in a neih tel tlat tur a ni. Thil harsa zawng zawng laka chhel taka awm tura hma latu a nih a ngai bawk. Sawifiahna atanga teh hian tun lai social activist tam takte hian he nihna hi an phu em? nge ahming maiin he title hi an nei ve satliah mai zawk em ni? Nge ni kan phuah ni chawp mai zawk em ni? Ngaihtuah chian ngai tak thil a ni.
SOCIAL ACTIVIST NI TURA PAWIMAWHTE
He nihna nei tur hian bachelor degree tal neih a tha a. Sociology, social science emaw, Sumdawnna nena inzawm subject engemaw hi a tha ber mai thei, mahse activism hna tam zawk ang bawkin tawn hriat (experience) hi a pawimawh zawk tlangpui. Human rights nena inzawm degree bakah human rights activist lo piang tharte tan chuan hands-on experience hi a pawimawh hle. Volunteer leh internship hmangin he huang (field)-ah hian luh theih a ni a; class dik tak lak emaw, lehkhabu dik tak chhiar emaw ang bawkin qualification hi a pawimawh hle a ni. Khawtlang inthlak danglamna hlawhtling taka siam tur chuan activist leh social movement-te hian chanvo hrang hrang pali an thawh a ngai a, chungte chu khua leh tui (citizen), helna (rebel), change agent, leh siamthalehtu (reformer)-te an ni. Role tin hian thil tum, style, thiamna leh mamawh hrang hrang a nei a, a hlawhtling emaw, a hlawhtling lo emaw pawh a ni thei. Mahse, tawrhna nen chhel taka beih a ngai a ni.
TUTE NGE SOCIAL ACTIVIST?
India ram mipui tluklehdingawn 1,439,518,023 awmnaah hian Social Activist 16 lek an awm mek. Mipui tam dan ngaihtuah chuan an tam lo hle. Chungte chu:
Kiran Bedi, (Civil Right Activist); Medha Patkar (Social Activist);
Dr. BR Ambedkar (Anthropologist); Laxmi Agarwal (Youtuber);
Baba Amte (Social Activist);
Ela Bhatt;
Sunitha Krishnan (Social Activist); Vinoba Bhave (Social Activist);
Aruna Roy (Social Activist);
Irom Sharmila (Political Activist); Kailash Satyarthi (Social Activist)
Mahatma Gandhi (Freedom fighter)
Vikalp Singh
Anna Hazare (Social Activist)
Aishe Ghosh (Social Activist)
Bant Singh (Social Activist).
Heng kan mi chhuanvawrte hi tlem hle mah se, India ram leh mipui, vantlang tana an thawhrimzia leh an inpekzawhzia ngaihtuahin an nihna dinhmun hi an phu hliah hliah a ni. An van fakawm tehlul êm!
GANDHIJI LEH AMBEDKAR
India ram pum leh khawvel huap pawha lang pha kan Social Activist chhuanawm takte kan hmel hriat ta. Abikin Babasaheb Bhimrao Ramji Ambedkar phei hi chu mithiam, khawtlang nun siamthatu leh India rama khawtlang inthlauhna tihbo nana a nun hlantu a ni. India of equals a din a, chu ram chuan tunhma lama harsatna tawk tawhte tan hun remchang tam zawk a siamsak a ni. Indian danpui duangtu a ni bawk. Ambedkar hi December 6, 1956 khan Delhi-a a chenna inah a muthilh laiin a boral ta a ni. Tin, Gandhiji pawh hi Kum 1888 atanga 1891 thleng England-ah dan a zir a, kum 1893 khan South Africa-a Indian firm pakhatah hna a thawk a. Chutah chuan India ram dikna chanvo humhalhtu tha tak a lo ni ta a ni. Kum 1906 khan tharum thawhna tel lova dodalna hmanrua satyagraha chu a hmang hmasa ber a, tichuan, Mohandas Karamchand Gandhi chu 30 January 1948 khan kum 78 mi niin New Delhi khawpui laihawl a in lian tak Birla House (tuna Gandhi Smriti) compound-ah Pistol-a kahhlum a ni ta a ni. A thattu hi Nathuram Vinayak Godse a ni a, Hindu fanatic a ni a, Gandhi hian India subcontinent-a Muslim tlem zawkte nen inremna a siam a duh loh vanga Kap hlum nia ngaih a ni.
A TLÂNGKAWMNA
Social Activist zawng zawngte thil tih kan chhui vek seng lo. Mahse, an inpekna leh thawh ropuizia chu ataka hretute kan ni. Kan Zorama Social Activist anga kan ngaihte nen chuan khing kan social activist tarlan takte khi an inthlau vet vet hle mai. Kan Social Activist-te hi chuan an nihna an hai deuh em, mi tihsual palh changa MRP Cybercrime lama FIR theh luh deuh chauh hi an hnathawh a ni ta em ni? Nge ni, engemaw project hna kal thalai bahlahna tura kawng daltu nih hrim hrim tum ni awm taka FIR thehluh lamah tan an la zawk em ni? Social Activist dik takte hi chuan mi harsatna sutkian leh tanpui ngaite tanpuia chhawmdawl ngaite chhawmdawla khai chhuah hi an hna a ni ngai a. Kan Zorama Social Activist ve ang reng deuha ngaih thenkhatte hi chuan mi harsatna siamsak lamah ke penin roreltu an ni ta emaw an inti mek niin a ngaih theih. Chuvangin, Mizo hnahthlakte hian mipui hmakhua ngaia thawktu tur Social Activist dik tak kan mamawh ta hle niin a lang. Thalai thangthar fel tak takte u, Social Activist dik tak ni thei turin tun atang hian rawn pên chhuak teh u. Zoram hi chhan tlak a la awm e.