Inrinni zan khan Indian Super League (ISL) 2023-24 play-off final khelh a ni a, Salt Lake Stadium-a inkhel hmuhnawm takah Mizo player pathum awmna Mumbai City FC chuan Mohun Bagan Super Giant lehthalin, ISL champion thar an ni. Final hmuhnawm takah hian Lalengmawia Ralte (Apuia) chu ‘Man of the match’ ah thlan a ni.
Salt Lake stadium-a mipui 62,007 zet pungkhawm hmaah mualneitu Mohun Bagan SG in bul an tan tha a, goal thun hmasa zawkah an tang. Kolkata club lian Mohun Bagan hian April 15-ah 2-1 an hneh a, an shield kawl mek an lo laksak tawh Mumbai City FC lakah hian minute 44-naa Jason Cummings goal thun hmangin hma an hruai. Cummings goal thun hmang hian si khat faia hmahruai chungin chawlhlawk an hmang a. An mikhual te aiin champion an hnaih zawk.
Chawlhlawk hnu lamah Mumbai City FC an khel tha ta viau a, goal pawh an thun thuai. Minute 53-na lekah Jorge Pereyra Díaz chuan goal thunin an si phurh a sut. Goal khat ve ve an thun hnuin inkhel a hmuhnawm zui viau a, goal thun tumin an innawr tawn nasa hle. Inkhel hmuhnawm takah hun rei tak chhung goal a luh belh theih loh hnuin hun tawp dawn hnaihah Mumbai team lian an chefuh a, goal hnih thunin mualneitu Mohun Bagan an lehthal.
2020-21 ISL champion Mumbai City FC tan hian Bipin Singh chuan minute 81-naah hma an hruai letna goal a thun. He goal hian mualneitu team a chhaihkawlh a, an si phurh sut tumin tan an khawh nasa hle. An khingpuiten na taka an nawr karah an him thei hram zel a, Mumbai team hian hun pek belh tawp dawn tepah goal thun belhin an chakna an nem nghet. Minute 90+7-ah Lallianzuala Chhangte siam tha tak chu Jakub Vojtus chuan chiang zetin a pet goal a, an goal thumna a thun. Vojtus goal thun hnu hian goal dang a luh belh tawh lo va, Mumbai City FC chu ISL champion thar an ni ta a ni.
ISL final-ah Mohun Bagan an hmachhawn tum hian Mumbai City FC tan Mizo player pahnih; Lallianzuala Chhangte leh Lalengmawia Ralte ten bul an tan a, Hmingthanmawia (Valpuia) chu bench-ah a thu thung. LZ Chhangte leh Apuia te hian an khel tha dun hle a, midfielder ball thiam Apuia hi final-a khel tha ber ‘Player of the match’ a ni nghe nghe. Mizo player pathum ten ngaihven an hlawh rualin, I League-a Aizawl FC champion pui tawhtu Jayesh Rane pawhin ngaihven a hlawh tel viau bawk. Aizawl FC atanga vul thar leh zual Rane hi champion thiam bik riau a ni a, I League-ah Aizawl FC a champion pui bakah hian ISL-ah ATK Mohun Bagan, Chennaiying FC leh Mumbai City FC te a champion pui tawh bawk a. India player zingah champion tam lamah ani aia record nei tha an awm bik kher lo ang.
ISL 2023-24 khelh zawh takah Jamshedpur FC chu khelmual nei tha berah thlan a ni a, FC Goa chu Grassroot nei tha ber niin, Bengaluru FC chu rawltharte hmasawnna lama titha bera thlan a ni bawk. Mimal chawimawina semchhuahah Mumbai City FC si nghak Phurba Lachenpa chu si nghak tha berah thlan niin Golden Glove a dawng a. Dimitrios Diamantakos chu goal thun hnem ber a ni a. Mohun Bagan player pawimawh Petratos chu player tha berah thlan niin, Mumbai City FC rawlthar Vikram Pratap Singh chu rawlthar player tha ber a ni ve thung.