Pathianni zana London derby khelhah Chelsea chuan an mikhual West Ham United chu 5-0 ngawtin an sawp a, Blues hian European competition khelh phak beiseina an nei thar. Inkhel dangah Brighton chuan an mikhual Aston Villa an hneh a, Champions League khel tura tling mai tur Villa an chelh ve bawk.
Chelsea hian Stamford Bridge-a an mikhual West Ham lakah an khel tha viau a, chawlhlawk hmain goal thum ngawt an thun hman. Chawlhlawk hmaa goal thum an thun bakah chawlhlawk hnu lamah goal hnih an thun belh leh bawk a, London derby-ah an chak chiang hle.
Stamford Bridge-a inkhelah hian season kal meka khel tha tluang tak Cole Palmer chuan minute 15-na lekah Nicolas Jackson siamsak atangin hmahruaina goal a thun. West Ham laka hmahruaina goal thuntu Palmer hian EPL season kal mekah goal 21 a thun tling ta chiah a, top scorer nih tumin Erling Haaland a um. Bleus in City atanga an lak Palmer hian football khawvelah a hming a chher lian chak hle a, Euro 2024-ah pawh a hmel kan hmuh a rinawm.
Cole Palmer-a’n hmahruaina goal a thun hnu hian Chelsea an khel tha chhunzawm a, minute 15-hnuah goal dang an thun belh leh. Stamford Bridge chhuahsan tur sawi zinga mi Conor Gallagher chuan minute 30-naah an goal hnihna a thun. Gallagher goal thun atanga minute rukna lekah Noni Madueke chuan Thiago Silva siamsak atangin an goal thumna a thun zui leh zat a, Chelsea hian 3-0 a hmahruai chungin chawlhlawk an hmang.
Chawlhlawk hnu lamah Chelsea an khel tha chhunzawm a, goal dang an thun belh leh thuai. Second half tan atanga minute thumna lekah Nicolas Jackson chuan an goal lina a thun a, Jackson hian minute 88-naah an goal naa thunin a tawp a khar zui leh bawk. London derby chu beisei phak lo takin a tawp a, Chelsea chuan an mikhual West Ham chu 5-0 in an sawp ta a ni.
West Ham laka awlsam taka point thum an hmuh hmangin Chelsea hian European Competition khelh phak beiseina thar an nei. Blues hian khelh 35 atangin point 54 an hmu a, pa 7-naah an awm mek. Tuna an awm meknaah hian season tawp thlenga an awm tluan thei a nih chuan Europa Conference League an khel ang. Hetihlai hian an lehpelh tak Manchester United chuan nizan khan Crystal Palace an hmachhawn a, United hi an chak a nih chuan Chelsea hi pariatnaah an tlahniam thung ang.
Pathianni zana inkhel dangah Brighton & Hove Albion chuan an mikhual Aston Villa chu minute 87-naah João Pedro goal thun hmangin an hneh. Brighton lakah an tlawm vangin Aston Villa hi champions League khel turin an la tling chiang bik lova, top 4 huang luaha season khar turin an nghah leh hlek a la ngai rih.