Pathianni zana English Premier League inkhel hmuhnawm takah Liverpool chuan Anfield-a an mikhual Tottenham Hotspurs chu 4-2 in an lo hneh a, champion beiseina tlem an la nei. Reds in champion beiseina chhete an la neih laiin Tottenham in champions league khelh phak an beiseina erawh a chuai ta viau thung.
- Anfield ah Reds an vul
Tunhnaiah beisei anga result tha nei hleithei lo, manager Jurgen Klopp leh player pawimawh Mohamed Salah an inhnial buai vanga boruak rit takin hual vel Liverpool hian Anfield-a an mikhual Tottenham lakah an ze ngai an chhuah a, an mualah an khel tha hle. Reds hian an mualah hnehna chang ngei tumin thapui an thawh a, an mikhualte an nawr bet tlat. An khelh that ang ngeiin goal li lai an thun a, goal hnih chhuah bawk mah se an phu ang ngeiin hnehna an chang.
An mualah mit la taka inlan Liverpool hian goal an thun hma hle. Inkhel tan atanga minute 16-naah Mohamed Salah chuan Gody Gakpo siamsak tha tak chu hnaite atangin a tauh goal a, hmahruaina goal a thun. Manager Jurgen Klopp nen boruak an neih lai vangin hlim hmel pu lo thin mah se West Ham laka goal a thun vangin Salah nui hmel hmuh tur a awm ve leh ta.
Salah goal thun hnu hian Reds in an mikhualte an nawr zui nasa viau a, goal thun theihna hun tha pawh an nei nual. An mikhualte nawr tawm viau mah se goal dang erawh an thun belh thei lawk lo. Chawlhlawk hmain goal dang a luh belh dawn lo emaw tih hnu minute 45-naah Reds hian goal an thun ve leh ta nge nge. Box chhunga fuh taka ball an inpek kual hnuin Andy Robertson chuan fuh takin a tawp a khar a, Spurs si nghak man per chu hnaite atangin a pet goal a, awlsam zetin an goal hnihna a thun. Robertson goal thun hnu hian goal dang a luh belh thei tawh lova, Reds hian 2-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm viau a, goal ruk ngawt a luh belh. Second half-ah pawh Liverpool in bul an tan tha leh viau a, goal an thun thuai. Reds hian Tottenham tlarhnung tihsual an hrem a, minute 50-na lekah Elliott ball vawrh luh tha tak chu Gody Gakpo chuan awlsam takin a tauh goal a, an goal thumna a thun.
Si thum fai ngawta hma an hruai hnuin Liverpool an khel tha chhunzawm a, goal pawh an thun belh leh thuai. An mikhualte talbuai lai an chuh a, an nawr na hle. Fuh taka ball an inpek kual hnuin Harvey Elliott chuan box pawn atangin top corner-ah pui zetin a pet lut a, minute 59-naah an goal lina a thun. Darkar khat em pawh an khelh tlin hmaa Reds in goal li ngawt an thun vangin chak zawk tur a chiang tawk viau a ngaih a ni a. Klopp-a naute hian goal tam zawk an thun belh ngei a rinawm viau bawk.
Si li fai ngawtin hnufual mah se Tottenham an hnual mai lova, an zam mai hek lo. Goal chhuah belh huamin an khingpuite an nawr chiam a, Liverpool hi thlamuang thei miah lovin an siam. Dinhmun chhe taka ding chunga huaisen tlat Spurs hi an che fuh a, goal an thun ta nge nge. Dinglam sir atanga Johnson ball cross tha tak chu Richarlison chuan minute 72-naah awlsam takin a pet goal a, an si phurh a sut then.
Goal khat an thun hnuin Tottenham an hlauhawm zui hle a, goal pawh an thun belh zui leh thuai. Team lian lakah goal thun thei tak Richarlison chuan box chhungah fuh zetin ball a dawng a, chiai hauh lova awmin Son Hueng-min tan tha zetin a chhawpsak zui. Tottenham captain Son hian lei hrulah fuh zetin a pet goal a, an si phurh a sut then leh. Goal hnih an thun zawn hnuin Spurs an khel tha zui viau a, goal an thun belh teuh thei hle. Richarlison pet tha tak chu si nghak Alison Becker chuan fuh zetin a dang a, Spurs hian penalty beisei bawk mah se an hlawhtling lo. Hun tawp rak thlengin an khingpuite an nawr na hle a, goal dang erawh an thun belh thei tawh lo. Liverpool pawh hian fuh taka nawr let chang nei bawk mah se goal dang an thun belh thei tawh bik lo va, Mohamed Salah goal thun pawh off side vangin hnawl a ni bawk. Goal dang luh belh lovin inkhel hmuhnawm tak chu a tawp a. Liverpool chuan Tottenham lakah 4-2 in hnehna an chang ta a ni.
- Reds beiseina thar
Carabao Cup-a champion tawh Liverpool hian trophy pathum tal lak theih beiseina sang tak an nei hman. FA Cup atanga an tlak hnuin Europa League atangin an tla zui leh. FA Cup leh Europa League atanga an tlak hnuin EPL-ah result an nei chhe zui bawk a, EPL-a champion an beiseina a chuai hman viau bawk. Pathianni zan khan Tottenham lakah tlawm se EPL a champion an beiseina pawh a thamral zui tawh mai dawn bawk. Tottenham lakah an result tha tak an neih vangin Reds tan champion theih a la ni a, champion tumin an tih theih apiang an tizui ngei ang.
Liverpool hian khelh 36 atangin point 78 an hmu a, pathumnaah an awm mek. Hmahruaitu Arsenal nen an inkarah point nga a tla zep mek a, pahnihnaa awm mek Manchester City aiin an khel tlem zawk a, point liin an hniam zawk mek bawk. Heti a nih vang hian Liverpool tan champion theih loh der a ni lo chungin champion erawh a har tawh viau dawn a. An khelh hmabak pahnihah chak ve ve pawh ni se an elpui lian Arsenal leh City result-ah an innghat thui viau tawh a ni.
Anfield-ah an tlawm leh tak vangin Tottenham tan Champions League khelh phak a har leh zual dawn ta viau bawk. Spurs hi an chung chiaha awm Aston Villa aiin vawi khatin an khel tlem a, point 7 in an hniam zawk mek. Chak mamawh tak chungin Liverpool lakah an tlawm leh ta si a, Europa League-ah an lungawi mai a ngai dawn ta niin a lang.