- Dr. C. Lalrampana
A KAMKÊUNA
India ramah hian State 28 leh Union territories 8 a awm a. Union Territory-te hi President-in a ruat Administrator kaltlangin a enkawl a ni. A lian ber atanga a tê ber thlengin India ram State/ UT tin hian Demography, history leh culture, incheina, festival, tawng etc. hrang hrang kan nei vek a ni. Kum 1986 khan India Parliament chuan India ram danpui siamthat vawi 53-na a pawm a, chu chuan February 20, 1987-ah Mizoram State siam a phalsak a, India ram state 23-na kan lo ni ve ta a ni. India ramah state 28 & UT 8 an awm chuan Chief Minister 36 zet an awm tihna a ni. State & UT tê leh lian pawh ni se, Chief Minister chu inzawl (level) khat vek an ni. CM 36 zet zinga engemaw kawng bera ‘ber’ nihna hauh hi thil namai lo tak a ni ang. Delhi CM Arvind Kejriwal (Rtd IRS) pawh hi lâr hle mah se, vote lak zawnga tehnaah chuan a chuti Lua lem lo niin a lang.
TU CHU NGE LÂR BER?
Kumin February 2024 khan Uttar Pradesh Chief Minister Yogi Adityanath chuan hlawhtlinna ropui tak a nei; virtual world mai mah ni se, a hlawhtlinna hi a ropui hle. X (Twitter hlui)-ah follower maktaduai 27.4 neiin, Prime Minister Narendra Modi (mtd 95.2) leh Union home minister Amit Shah (mtd 34.4) te hnuaiah India politician follower tam ber pathumna a ni. Mahse, a larna hi social media-ah chauh a innghat lo. India Today Mood of the Nation (MOTN) poll-ah a zawnin vawi riat zet ram puma zawhna chhangtute chuan chief minister 30 zingah Adityanath hi a ?ha ber niin an sawi. Tin a khingpui hi Arvind Kejriwal a ni. Delhi chief minister hi zawhna chhangtu zinga zaa 19.6 chauhin an thlawp thung a ni. Adityanath-India popularity hi hetia a lãr tak êm êm nachhan hi a monu thar vang niin an sawi. Popularity Survey: Chief Minister lar ber Top 5-ah Yogi Adityanath, Uttar Pradesh Chief Minister chuan 51.3 % popularity rating neiin pahnihna a nileh hlauh si. ANI Updated: Pathianni, February 18, 2024,-in a tarlan danin tun hnaia media pakhatin hruaitute pawm theih dan tehna atana survey a neihah Survey-a a lan danin, Odisha Chief Minister Navin Patnaik chu pakhatna a ni a, popularity rating 52.7% a hmu a ni. Uttar Pradesh Chief Minister Yogi Adityanath chuan 51.3% popularity rating hmuin pahnihna a hauh a ni. Pathumna hi Assam Chief Minister Himanta Biswa Sarma a ni a, ani hian 48.6% a hmu a, palina hi Gujarat Chief Minister Bhupendra Patel a ni a, 42.6% a hmu bawk. Dr Manik Saha hian 41.4% popularity rating a hmu a ni. UP Chief Minister Yogi hian Odisha CM hi pha lovin lang mah se virtual world X (Twitter hlui)-ah follower maktaduai 27.4 neiin khawvel pum huapah erawh Odisha Chief Minister Navin Patnaik hian a la khan lo deuh a ni. Yogi hi engvangin nge a lar êm êm? Yogi hi kum zabi 12-na CE atang khan Hinduism Nath siddha tradition member a ni a, Hinduism, Buddhism leh Jainism-ah tantra hmangtu a ni bawk a. Hindu thawnthua pathian Shiva leh pathian Parvati-te emblematic yogi–yogini pair anga an ngaih vang a ni.
KAN ZORAM VE HI
Mizoramah hian ramngaw zau tak tak kan nei ve a, national park awmna hmun a ni. Tourism, culture, leh tradition hrang hrang avangin hriat hlawh tak kan ni. Aizawl hill station hi Mizoram khawpui ber a ni. Khawvel hmun hrang hrang atangin Mizoramah hian a ramngaw leh ramngaw karah chawlh hahdam duh leh chawl hahdam turin an lo kal ve thin. A tha lo zawnga tehin India ramah ber nihna 14 lai kan nei. Hetih lai hian kawng 5-ah a tha zawngin India ramah ber nihna kan hauh ve mek a, chungte chu:
India rama Inkhawm tam ber leh thawhlawm thawh uar ber kan ni.
India rama state hlim ber kan ni.
India ram leh khawvel huapa state ralmuang ber kan ni.
India rama Sunday serh uar ber kan ni.
India ram state-a hmeichhe damrei ber kan ni.
Kan chhiatna laite hian kan that vena lai hi a hliah nasat êm avangin chhe lailet der emaw kan inti thin. He ngaihdan tha lo tak hi paih bo a hun hle. A nâwlpuia teh chuan Mizoramah hian mi fel leh tha tak tak tam tak kan awm a; misual erawh tlêmte chauh zawk an ni tih hriain mahni insit ngawih ngawih lovin insiamthat theuh tum ila a hlawk zawk ngei ang.
A TLÂNGKAWMNA
India ram CM 36 zinga lâr ber ber UP CM; Odisha CM; Assam CM; Gujarat CM; Tripura CM leh Delhi CM-te angin Mizoram hi lang pha ve lo mah ila tuna kan CM Pu Lalduhawma hi a huaisen hle niin a lang. Saiip puan sin meuhin sual ngaihdamna dilin a inhlan thar ngam a, thil dik lo a hmuh leh a hriatte a puang hmiah hmiah ngam te, fake account hmangtute chungchang leh fake document hmanga zirtirtu 28 lak tawh bân an nih thu te, contractor leh supplier ven ngai reng te, chartin 4×3 tling lo, lung cubic tling lo, BPL dik lo, ration card dik lo etc. leh kan khawtlang nun chhiat tawhzia a sawi chhuak piap piap ngamte hi a van chhunawm tehlul êm! Sorkar ang pawhin sorkar hnathawk aikal la mi 3365 an nih thu leh thih hnu thleng thlenga aikal la mi 9 lâi awm mekte tar chhuah an ni theite hi siam that nghal vek theih ni rih lo mah se, kan thlen chin zelah a la tha chho viau rih niin a lang. Mizoram hi India rama state tê ber pangana a ni a, km. 2 21,087 (8,142 sq mi) a zau, hriatthiam awlsam zawngin a dung mel 200 a vang mel 100 niin tropic of Cancer paltlang kan ni. Hetiang state zim tê hi kan CM hian huaisen takin kaihhruai zel se, khing a sawi lan bak LSC thlawk thei siamtu Revenue department-te hi lepse ngam se, sorkar hnathawk aikal la zat a zawnchhuahtir ang hian LSC thlawk thei awm zat leh land least thlawk thei awm zat zawn chhuahtirin, inhmun lo ram man to uchuak lutuk land value leh market value inthlau lutukte hi dan fel tak siamin price control khawih ngam se UP CM Yogi leh Odisha CM Navin Patnaik, Delhi CM Kejriwal-te ai chuan kan ram tan a hluin a lâr ngawt ang. Engpawhnise, dawhthei takin I lo thlir zel phawt teh ang u.