Kar tawp khan tual chhung football khelh chhunzawm a ni a, inkhel hmuhnawm tak tak a awm. English Premier League-ah champion tura inum boruak a ngaihnawm em em laiin Spanish La Liga-ah chuan Real Madrid an champion chiang ta thung. Italian Serie A-ah Inter Milan an champion a, German Bundesliga-ah Bayer Leverkusen. French Ligue-ah PSG an champion chiang tawh bawk. Europe-a league lian zualah goal lut a tam rualin MLS leh Saudi Pro League lamah Lionel Messi leh Cristiano Ronaldo ten boruak an nei lian viau bawk. Kar tawp football-a thil thleng langsar zual kan thlir kual leh thuak thuak ang.
- English Premier League
Championship club Ipswich Town chu English Premier League-ah an kaisang dawn tih a chiang tawh a, an ni hi English club zingah Premier League era-a League One – Championship – Premier League-a kaisang zawn pangana chiah an ni. Ipswich Town hmaah hian Watford (1997-98. 1998-99), Manchester City (1998-99, 1999-00), Norwich City (2009-10, 2010-11) leh Southampton (2010-11, 2011-12) te League One – Championship leh EPL-ah a zawn zatin an lo kaisang tawh.
Inrinni zanah Manchester City in 5-1 ngawta Wolves an hneh tumin Erling Haaland chuan chawlhlawk hmain hattrick a siam hman. Haaland hian chawlhlawk hmain vawi ruk ngawt hattrick a siam tawh a, chawlhlawk hmaa hattrick siam tam lamah Cristiano Ronaldo (vawi 7) chiah a tluk lo va. Haaland hnuaiah hian chawlhlawk hmaa hattrick vawi nga siam Lionel Messi a awm ve thung.
Liverpool player pawimawh Mohamed Salah chuan season kal meka inelna hrang hrangah goal 25 thunin assist vawi 10 a nei tawh bawk. Salah hian season nga chhung inelna hrang hrangah goal 25 thun leh assist vawi 10 a nei zawn tawh a, Kyllian Mbappe record a nih rual.
Arsenal player pawimawh Bukayo Saka chuan EPL-ah goal 47 a thun tawh bakah assist vawi 35 a nei tawh bawk. Kum 23 tlin hmaa goal thawkchhuak hnem panngana niin Romelu Lukaku record a nih rual. Saka hian September thla hmain EPL-ah goal thum a thun hman a nih chuan kum 23 tlin hmaa EPL-a 50 thun tling leh assist vawi 30 chin nei thei hmasa ber a ni ang.
EPL atanga tlahniam tawh Sheffield United chuan record duhawm lo lam an hnutchhiah. Shefffield hian EPL season kal mekah goal 100 zet an chhuah tawh a, game tinah goal 2.78 chhuah zel ang an ni bawk.
- Spanih LaLiga
Inrinni zanah FC Barcelona an tlawm vangin Real Madrid chu La Liga-ah a vawi 36 nan an champion. Real Madrid an champion tak vangin Nacho leh Lukas Modric te chuan trophy 25 an la tling ve ta chiah a, Marcelo leh Karim Benzema te record an nihrual. Real Madrid hi champions league-ah champion thei dinhmunah an la ding a. An champion an nih chuan Nacho leh Modric te hi Real Madrid tana trophy la hnem ber an ni ang.
Inrinni zan khan Girona chuan Barcelona chu 4-2 in an hneh. Girona hian season kal mekah Barcelona hi vawi hnih an hneh zawn a, goal hnih in an hneh ve ve bawk. Kum 60 zet chhungin season khatah goal hnih china Barcelona hneh zawn thei palina an ni.
Real Madrid tan Jude Bellingham chuan goal 18 a thun tling tawh a, Real Madrid tan season thara goal thun tam pangana niin Hector Rial record a nih rual. Kum 21 tlin hmaa Real Madrid tana goal thun hnem ber chu Raul a ni a, ‘Golden Boy’ an tih mai Raul hian 1995-96 khan goal 19 a thun a, 1996-97 khan goal 21 a thun leh bawk.
Kum 30 mi Iago Aspas chuan La Liga-ah goal 108 a thun tling ta a, kum 30 tlin hnua La Liga a goal thun hnem palina niin, Luis Suarez goal thun zat a nihrual.
- German Bundesliga
Bayern Munich tan Harry Kane-a chetha tluang zel a, Bundesliga-ah goal 36 a thun tling der tawh. 1962-63 hnu lamah English player zingah season khata goal thun hnem ber ni mek Kane hian inelna hrang hrangah goal 44 a thun tling tawh a. PSG leh France forward Mbappe aiin goal a thun hnem zawk mek.
Leverkusen si nghak Lukas Hradecky chuan Bundesliga-ah goal vawi 292 a veng tawh a. Bundesliga-ah foreign si nghak zinga goal veng hnem ber record thar siam in, Yann Sommer (291) record a khum.
- Messi-Ronaldo
Major League Soccer lamah Lionel Messi a vul hle a, game ruk chhung zet goal contribution a nei zawn tawh. Hei hi MLS-ah goal contribution nei zawn rei ber tum a ni. Messi hian Inter Miami in 6-2 ngawta New York Red Bulls an hneh tumin goal khat a thun bakah assist vawi nga zet a nei bawk a, hei hi MLS game khata assist ngah ber record a ni nghal bawk.
Messi hian game sarih chhung goal a thun zawn tawh a, FC Barcelona tan a khelh lai 2021 hnu lama goal a thun zawn rei ber tum a ni hial bawk.
Inrinni zanah Al-Nassr in 6-0 ngawta Al Wehda an sawp tumin Cristiano Ronaldo chuan hattrick a siam. Ronaldo hian football a khelh zawh zawng zawngah club leh ram tan hattrick vawi 66 zet a siam tawh. Portugal tan hattrick vawi 10 a siam, Real Madrid tan vawi 54, Juventus leh Manchester United tan hattrick vawi nga ve ve a siam tawh bawk.
Ronaldo hian season kal mekah goal 45 zet a thun tawh a, hei hi Ballon d’Or a dawn tum 2015-16 season a goal 51 a thun hnua goal a thun tam leh ber tum a ni.