Nimin zing khan B Lalchhanzova, Aizawl East-II bialtu MLA chuan a bial chhung Dawrpui huam chhunga Assam Rifles lungbang nghenga drain tha tawk lo a en fiah a, kawngpui sir tui luanna fel tawk lo hian kawngpuiah tui tling a siam a, Vanapa Hall kawt te pawh tui tling hian a ti buai nasa thin hle a, Minister hmalakna bawhzui hian nimin vek khan PWD lamin heng side drain te hi an hai fai nghal bawk.
B Lalchhanzova chuan, “Assam Rifles ram, lung bang phei Bazar Bungkawn atanga Treasury Trafic Point thleng hian fai leh mawi taka enkawl a tul a, Sawrkar Department hrang hrang te nen a theih anga anga thawkho in, a tul dan angin MLA fund hmang pawha tha thawh kan tum a ni, he lai phei hi Aizawl hmel lanna pawimawh tak a ni a, a mawiin a fai chho hle tur a ni, rawngte hnawihin cheimawi chhoh a ni ang a, pangpar pot te dahin hmuh nuam taka siam tum a ni, Aizawl thianghlimna leh mawina a mawhphurtu a in ngai zawng zawng mimal leh pawlte thawhho puiah ka sawm bawk a ni,” a ti.
He lai hmunhma felfai zawka enkawl tur hian Assam Rifles leh DC lam te nen pawh sawiho tawh a ni a, lungrem phei cheimawi leh tihfai kawngah thawhhona thuthlungte pawh siamin hma lak chhoh tum a ni, Chhanzova chuan a ti bawk.
Nimin zinga Assam Rifle lungrem phei enna ah hian PWD Road North Division EE leh a ho te, AR Deputy Commandent, Dawrpui Local Council, Dawrpui YMA, Dawrpui South Welfare hruaitute an tel bawk.