Mizoram Bawm Students’ Association Conference 2024, Hmawngbu, Lai District-a hman mekah Lalmuanpuia Punte, Adviser to Chief Minister (Political) chuan khuallian niin a hmanpui.
Thu sawiin, Lalmuanpuia Punte chuan, “Zo hnahthlak hnam hrang hrangte hi a hrang angin lang mah ila, kan chi peng sawi dànah kan hrang tak tak lo. Kan inawmpawlh vek a. A chi peng angin sawi dan kan nei vek. Mizo vek kan ni a, tumahin kan nihna hi kan zahpui tur a ni lo a. Keimahni theuh kan inngaihhlut hian kan ropui a ni mai. Mahni zia zahpui loh tur, mahni hnam zahpui loh tur, kan zahpui chuan kan hnam a ral dawn tihna a ni mai.” a ti.
Adviser to Chief Minister chuan,”Aizawl ah MBSA in hostel in la nei lo tih ka hria a, ka pe ang che u, ka ti thei lo a. Ka theihtawp ka chhuahpui ang che u. Tin Mizoram Schedule Tribe list hi siam that tum mek a ni a. MZP in rawtna a lo siam tawh zulzuiin kan zavaia kan tel theih dan tur kan ngaihtuah ang. Hnam hi tumah inti bik awm loa kan tangrual a nih chuan tumahin min ngam bik dawn lo. Insumdawn tawnna kawngpui bul maia awm in ni a. He kawngpui hi hmang tangkai turin kan sumdawng pha ve dawn em tih ngaihtuah a ngai. An tirhkaha tang mai mai lo turin kan inbuatsaih a ngai. A hlawkna tel tur tak taka kan inbuatsaih a ngai. Development hian hnam a tiral fo a. Chumi laka kan inven theih nan kan inbuatsaih a tul hle a ni. Kan tam ve a ngai a, fa pawh kan theih anga tam kan neih a ngai a ni. Mizo hnam hrang hrangte hi kan tanrual a, kan inhlawmkhawm that phawt chuan khawvela hnam ropui takah kan insiam thei ang,” a ti.
Lalmuanpuia Punte hian Hmawngbu leh a chheh vela Bangladesh atanga ral tlan inbenbelna hmun a tlawh nghal a. An dinhmun leh sorkar in a tih theih tur ngaihven nghalin a hmunah an harsatna a en nghal bawk.
Lalmuanpuia Punte hi Lai District ZPM hruaitu eng emaw zatin an tawiawm bawk a ni.