- Dr. C. Lalrampana
A KAMKEUNA
Kãng hi damdawi lam tawngkãuchheh chuan thermal tih a ni mai awm e. Mizo Chuan kãng (heat) kan ti a. Chihrang hrangin kan then tehchiam lo. Damdawi (medical) lam atang chuan kãng hi chithuma then a ni. Kãng satliah (First-degree burns); Kãng na deuh (second-degree burns) leh Kãng nasa/thûk (third-degree burns) tiin an then a ni. A pathumna (third-degree burns) hi chu mihring nunna arana hlauhawm chin hi a ni.
Kãng hi chhan hrang hrang vangin a awm thei. Chungte chu a tlangpui tårlang ila: tuisã/so; tel sã/so; mei alh/meiling; ni sã; toxic chemical; electricity; radiation; gas; tek etc. te a ni. America ramah khuan kumtin mi maktaduai tel tehmeuh khuan intihkan palh avangin damdawi in an pan thin.
A ENKAWL DAN
Kãng hi a nasat dan leh nasat loh dan azirin enkawl Dan chihrang hrang a awm. Vun a kan tel loh chuan durh, vun chat, a pun tur ven nan kawmawl, kawrchung, puanhlap, buara emawin tuam/khuh thawk tur. A kãng lai hmuamhma khuh zo tawk puan fãi thianghlim taka tuam a tha a, tuam hmain a hmuamhmaah sodium bicarbonate phul a, tuithianghlima chawh diak hnuah tuam hnan thin tur a ni. A kan nasat chuan a hmuamhmaah bacitracin ointment hnawiha tuam hnan thin a tha.
ENKAWLNA DANG
Mizo tualchhual damdawi leh hmanraw mãwltê tê tha ve tak tak a awm a, damdawi in leh daktawr pan ve thei lote tan leh rikrum thila hman ve mai theihte hetiang hian tårlang ila.
Hmarcha tãi:
Hmarcha tãi rãwtsawm emaw rãwtswm kher loh pawhin a pum hmeh kehin kãng hmuamhmaah hnawih/tah a tha. A nãin a thip thei hle a, mahse, a rei lova ser a siam zui lo bawk.
Kãng damdawi:
Mizovin kãng damdawi kan tih mai hnah hlai bial sãwl (oval) hnãi emaw a hnah densawm emaw hnawih/bela tuam hnan a tha.
Olive hriak:
A hmuamhmaah olive hriak hnawih thin a tha.
Aloevera:
A hmuamhmaah Aloevera hnah chhunga a hnãng (gel) lak chhuaha hnawih thin a tha.
Calendula:
Pangpar chikhat Calendula atanga siam a hriak leh cream hnawih a tha hle.
Ser (citrus lemon):
Ser Thur chikhat rah bial sãwl citrus lemon a rah min eng, thenkhat chuan nimbu ti pawn an sawi thin. A tui (juice) hnawih hi a tha hle.
Eucalyptus:
Eucalyptus hnah atanga a hriak lak chhuah tui chhuansoa pawlha silfai leh a khu/a hüa ur thin a tha hle.
La pãr:
La pãr leh a hnah densawm a hmuamhmaa hnawih thin hi kãng sa lutuk tinuamtu atan a tangkãi hle.
Tumbu laimu:
Tumbu chhungril laimu densawm bel hnana tuam hi a damdawi tha tak a ni thei.
Tui luang:
Kãng hmuamhma sa lutuk vawn daih nan tui luang lai emaw tui herhaw emawa minute 10 chhung khawhtir thin a tha hle.
Sa thãu:
Sa thãu er atanga a hriak lak chhuah a hmuamhmaah hnawih thin a tha hle. Saphai thau pawh tha hlea ngaih a ni.
Vitamin E:
Vitamin ‘E’ mum capsule ei a, vitamin ‘E’ oil hnawih bawk hi a damdawi tha tak a ni.
A TLÃNGKAWMNA
Khing tarlan bak pawh khi hmanraw tha tak tak tam tak a la awm a; sawi vek sen a ni lo. A enga pawh khi hmang ila theihnghilh miah lova a hun hman dan tur ang taka kan hman thlap chuan a enga pawh khi kãng enkawl nan an tangkãi êm êm vek tih briat a pawimawh hle.
Keima tawn hriat ve chinah chuan kãng (thermal/heat/burn) enkawl nana chawplehchilha tha ber nia ka hriat chu ui thãu erfuna tel hnawih/chulh a tha ber. Mizopa uisa ei nasa tan phei chuan a thãu hmuh a awlsam a, a thãu era a hriak saidawium bur thianghlimah dah that khiau a, intihkan palh leh chetsual palh thulhah rikrum thila hman tangkãi mai tur a ni e.