Inrinni zana an khingpui Tottenham lakah an tlawm vangin Burnley chu English Premier League-ah inhamtang zo lovin Championship-ah an tlahniam. EPL atangin Sheffield United leh Burnley an thlahniam tawh a. Luton Town emaw Nottingham Forrest emaw zawk zawk an tlahniam zui leh ang.
Him beiseina tlem la nei tura chak ngei ngei mamawh Burnley hian London Stadium ah bul an tan chhe lova, goal thun hmasa zawkah an tang. Minute 25-naah fuh zeta an nawr tlang hnuin Jacob Bruun Larsen chuan chiang zetin a pet goal a, hmahruaina goal a thun. He goal vang hian Vincent Kompany team Burnley phurna sang tak nei bawk mah se an goal an venghim rei thei lo.
Champions League khelh phak beisei zui thei tura chak ngei ngei mamawh Tottenham hian na takin an mikhualte an nawr let a, fuh zeta an nawr tlang hnuin Pedro Porro chuan minute 32-naah chiang zetin a pet goal a, an si phurh a sut. Inkhelh hmuhnawm takah hian chungnung zawk awm lovin chawlhlawk an hmang.
Chawlhlawk hnu lamah inkhel a hmuhnawm zui viau a, goal pawh a luh belh har hle. Goal lut a awm theih loh reng hnuin Micky van de Ven chuan minute 82-naah hma an hruai letna goal a thun a, he goal hi an chakpui zui ta a ni.
An mikhual Burnley lakah an chak vangin Tottenham hian UCL khelh phak beiseina an la nei a, an chunga awm mek Aston Villa chetsual an chang. Spurs hi Villa ai hian point liin an hnufual zawk mek. Villa hian zanin hian Villa Park-ah Liverpool an mikhual dawn a, an mualah an chak a nih chuan UCL khel turin an tling chiang nghal ang a, Tottenham beiseina an titawp ang. Liverpool lakah an tlawm a nih erawh chan an khelh hnuhnung beah chak ngei an mamawh tawh thung ang.
Spurs lakah an tlawm vangin Burnley an tlahniam a, championship lamah hun an hman leh phawt a ngai dawn.