Nimin khan ZPM Central Block Mamit hruaitute chuan District Hospital Mamit Khum 100 awmna tur building, ni 26 September 2023 a hawn tawh tun thleng a luah luh la ni lo chu a hmunah an tlawh a, Dr. Lalrinfela. H, DMS Mamit in a lo dawngsawng.
A hmuna tlawhtu ZPM Central Block Mamit hruaitute chuan, District Hospital Mamit Khum 100 awmna tur Building hi ni 26 September 2023 khan khatih hunlaia Health Minister Dr. R. Lalthangliana chuan hawng in, a hawnna programme ropui taka neih a ni bawk a ni. Mahse, hospital building hawn atanga thla 8 hnu vawiin a ZPM Mamit Central Block hruaituten Hospital building an tlawh pawh in building hi siam/sak zawh ala ni lo a ni, tiin thuchhuah an siam.
Hnathawktuten an sawi dan in District Hospital Mamit building hawn a nih lai khan 60% vel chiah hna la zawh a nih thu leh tunah hian 93% vel hna hi zawh a nih tawh thu an sawi a. Tin, Hospital building sak hi a design tam tak a fuh tawk lo hle a, Room tam zawk phei chu chhun engah pawh ni eng a luh theih loh avangin a thim vek thu leh tukverh a tlem avangin boruak tha a luh tam theih dawn loh avangin hriselna atan a pawi thei dawn niin a lang bawk a ni, tiin an thuchhuahah chuan an tarlang.
ZPM Mamit hruaitute chuan hospital sak leh design hun lai khan hospital tha leh changtlung neih aia sum leh pai siamna atana hman an ngaipawimawh zawk emaw tih tur zawk a, a awm chu pawi an tih thu an sawi a. Khum 100 awmna Hospital building chhawng 5 meuhah Fire Exit (Emergency Exit) Pakhat chiah a awm chu a tha lo in a him lo hle ah kan ngai a ni. Chu mai bakah Hospital thawktute duh dan ang ni lo a Labour Room (Nau neihna) siam a ni chu pawi a hle a, hun lokal zel turah harsatna a awm ang tih a hlauhawm hle a ni. Nimin a ZPM Mamit hruaituten District Hospital Mamit Building tlawh a nih lai pawh hian, hmun thenkhat chu siam that leh ngai nghal a awm nual tih hmuh a ni, tiin an sawi bawk.
District Hospital Mamit Khum 100 awmna tur building sakna atan hian a vaiin 17.93 Crore ruahman niin, Power Finance Corporation Ltd. CSR atangin 70% (12.55 Crore) hmuh niin, a bak zawng (30%) hi State Government atangin hmuh a ni. Hospital Main Building sakna atan hian 16.93 Crore hman a ni a, 1 crore hi a hnamrua leina atana tih a ni bawk a ni.
Dr. Lalrinfela H. District Medical Superitendent, Mamit chuan Hospital building thar chu luah luh vat a nih theih nan hnathawktute pawh a theih ang anga hna chak zawka thawk tura nawr reng an nih thu leh a dik lo leh tha lo lai pawh siamtha tura an ngen thin thu a lo sawi a. Hospital building tha zawk an neih ngei theih nan ZPM Mamit hruaitute chu theih tawp chhuahpui turin a ngen bawk.
Tin, ZPM Mamit Central Block hruaitute chuan Hospital Building Khum 100 awmna tur chu mipuiten tangkai taka an hman theih nan leh luah luh vat a nih theih nan theih tawp an chhuah zel tur thu leh Health Minister pawh a rang thei ang bera a hmunah ngei tlawh tura an sawm tawh thu an sawi a, Dr Lalrinfela H, DMS Mamit leh a thawhpuite thahnemngaihna leh inpekna chu fakawm an tih thu an sawi bawk a ni.
ZMP Mamit Central Block chuan, District Hospital Mamit Khum 100 awmna building sak zawh a nih hma leh, a nihna tura mipuite chhawr theih tura a awm hma a, hmingthat hlawh duh luat avanga hawn ringawt a ni kha zahthlak kan tiin pawi kan ti hle a, mipuite ngaihnepna leh hmuhsitnaah kan ngai hial a ni, tiin an thuchhuahah chuan an tarlang bawk a ni.