Thawhtanni khan ZPM chuan an Party Office-ah chhung inkhawm hun an hmang a, thusawitu Dr.KC Malsawmzauva, Adviser to Chief Minister chuan, “Model Code of Conduct zo se, ZPM Policy thlai thar lei tura hmalakna kalpui thuai kan chak tawh takzet a ni” a ti.
Dr.KC Malsawmzauva chuan, “Model Code of Conduct a zawh hunah thlai thar lei tura kan ruahmante mumal zawka puangzarin policy atangin Programme-ah kan lut dawn a. Heng thlai thar leitu turte hi kan dawr mek zel a, agreement mumal tak kan siampui ang. Politics rawngkai lova rual taka kan kal theih nan Regulated Market Society-a kalpui kan tum avangin Firming Society din tur a ni a, chuvangin Cooperation hnuaiah Society tinin Registration an tih a ngai. Mirethei lam tang tur kan nih avangin anmahni khaichhuah hi kan tum ber a ni a. Agriculture department hnuaiah Marketing Board din a ni dawn a, Cabinet meeting hmasa berah chhawpchhuah tum a ni. Thlai thar pali – Sawhthing, Aieng, Hmunphiah leh Hmarchate hi kan leina tur rate bithliah aia sanga an hralh theih chuan sawrkar inrawlh kher kan tum lova. Rate bithliah kan siamte hi Grade A niin Sawhthing leh thlai dangte aiin Hmarcha hi market tha ber a ni tih ka sawi duh bawk,” a ti.
Adviser to CM Pu KC-a chuan, “Thlai thar lei chungchangah kut hnathawktute kan dik a ngai a, hralh duh luat vang leh hlawk tum luat vangin dik lo taka thlaitharte hralh duh an awm thin a, mi depde leh hlemhlete avangin mualpho theih a ni. Kan sawrkar tirh khan hmunphiah chungchangah sawiselna kan tawk a, uluk zawk leh tha taka kan kalpui theih nan rate bithliah chungchangah pawh kan fimkhur hle a, Mizoram hmun hrang hranga an chinte zirchian mek zel a ni. Warehouse paruk siam tum a ni a, dahthatna hmun kan neih chuan a thar loh hunah pawh hralh theih a ni ang,” a ti.
A sawi zelnaah, “Bana kaih (Hand holding) policy kan zawrh chungchangah hma la turin Department 17-te sawihona kan neihpui tawh a, Agriculture & Allied Sectors, Tourism leh Industry-ahte pilot project kalpui phawt tur a ni a. Thlai thar lei kan tum avangin hei hi kan hmanhmawh chuk chuk thei rih lova, sem policy ang ngawta kalpui tur a nih loh avangin Hand Holding hi Bank loan hmangin project base-a kalpui kan tum a ni. Tin, Chief Minister Special Package pawh awm thei tura ruahman chhin a ni a. Ruahmanna felfai tak nen fimkhur taka kan kal a ngai a, hlawhtlin kan tum takzet zet a ni,” a ti bawk.
An party chhung inkhawm hi PB Lalsawmliana, General Secretary chuan a kaihruai a, KL Remsiama, Vice President, Upa Committee chuan hunserh hmangin chhung inkhawm hun hi Lalrinpuii, Minister, Prof.Lalnilawma, MOS bakah Ginzalala, Adviser to CM, Dr.Kenneth Chawngliana, Planning Board Vice Chairman, MLA-te leh Party hruaitu thahnem takin an telpui a ni.