Vawk pul hri, African Swine Fever (ASF) hri leng avangin kuminah vawk sang tel a thi leh tawh.
Vety department chhinchhiah danin, nimin khan Falkland Vengah vawk 3, Muallungthu-ah vawk 3, Thingsul Tlangnuam leh Chhingchhipah vawk 1 ve ve leh Khumtungah vawk 9 a thi a, a vaiin vawk 17 a thi leh a, heti hian kumin chhungin hri avangin vawk 718 a thi tawh.
Hri darh zel tur ven nan January atanga May ni 15 thlengin vawk 640 suat a ni tawh bawk a, ASF vanga vawk thih phah hi a vaiin vawk 1358 a tling tawh a ni.
Hri leng hian vawk man a tih hniam phah nasa hle bawk a, Mizoram Pig Farmers Association hruaitute chuan vawk pum, kg 100 tling tur Rs.35000 man vel ni thin kha tunah chuan Rs. 20000 bawr vel a ni der tawh tih an sawi.
ASF avangin an vawk vulh lai an chan a, chuta karah vawk dam awm chhunte pawh man tlawm takin an hralh lo thei si lo a, hengte avang hian vawk vulhtute an mangang hle a ni.
Pig Farmers Association hruaitute chuan vawk vulh tute’n puih an ngai hle tih an sawi a, hri leng leh mek hi a darh chak hle a, vawk farm lian thenkhatah te chuan vawk 100 tel dawn te an thi leh tawh tih sawiin,”Puitu kan mamawh a ni,” an ti.
Hri leng avangin mipuiin vawksa an thinhrik a, vawksa zuarte pawh an in hralh hlei thei lo, a vulh tute chauh lo, a sa zuartute pawh hri leng avangin an mangang hle.
Aizawl chhunga vawksa zuar te’n vawksa an hralh hlei thei lo, Aizawl Venghlui Bazara vawksa zuar te chuan an in hralh hleih theih loh thu an sawi a, vawk pum khat hralh zawh pawh a harsa hle niin an sawi a, helai bak Aizawl New Market leh hmun danga sa zuar te pawhin vawksa hralh a harsat thu hi an sawi hlawm a ni.