Zirtawp zing khan NBA conference play-off final khelh chhunzawm a ni a, Boston Celtics in Eastern Conference Final-ah Indiana Pacers an hneh nawn leh a, series ah 2-0 in hma an hruai.
Eastern Conference Final game hnihnaah hian game khatnaa tlawm tawh India Pacers in bul an tan tha a, quarter khatnaah point hnihin an chungnung. Quarter hmasa berah hnufual zawk ni bawk mah se Celtics an insiamtha thuai a, quarter dang pathumah chungnung zawk ni vekin hnehna an chang nawn leh. Celtics hi quarter hnihnaah point 8 in an chungnung a, point ruka hmahruai chungin chawlhlawk an hmang.
Chawlhlawk hnu lamah Celtics an khel tha chhunzawm viau a, quarter thumnaah point 7-a an chungnung hnuin, quarter hnuhnung berah point thumin an chungnung zui leh a. An khingpuite hi point 16 ngawt (126-110) in an hneh a, final game hmasa pahnihah hnehna an chang zawn.
Indiana Pacers laka an chak nawn leh tum hian Jaylen Brown chuan point 40 lai a thawkchhuak a, a chetha hle. Brown hi Celtics tan chetha thawkhat viau mah se NBA 2023-24 a player tha zual 15 zingah a tel phak lo tlat thung. Nilai ni khan All-NBA thlan an ni a, mi 15 zingah Brown hian hmun a chang ve ta lo a ni.
Eastern Conference final game hnih khelh a nih tawh laiin West Conference lamah chuan final game khat an khell zo tawh a. Final thawhkhatnaah Dallas Mavericks chuan Minnesota Timberwolves lakah 1-0 in hma an hruai.