Sorkar department hrang hrangin mipuite rawngbawl hna mumal zawk leh tha zawka an thawh theihna tura dan siam, The Mizoram Right to Public Service (RTPS) Act 2015 chu tun thlengin hmang tangkai an la awm lo.
Department of Personnel and Administrative Reforms (DP&AR) hotute’n an sawi danin, sorkarin mipuite hnena service hrang hrang a pek chhuah thinna tur dan RTPS Act hi december ni 1,2015 atangin hman tan a ni a, he dan hi kum 9 dawna upa ni tawh mah se mipuiin a takin an la hmang tangkai lo thung a ni.
DP&AR hotute chuan RTPS Act hnuaia service pe thei department te hi dan in ti tura a tih angin mipui tanpui thei turin an in ruahman vek niin an sawi a, RTPS Act hman dan vil tu inspecting officer te’n service pe thei department hrang hrangte an endiknaah pawh an office notice board ah te service an pek theih te an tar chhuak vek a, department lam hi chu a in peih a, mah se mipui lamin dan tha tak hi hman tangkaina chang an la hre lo niin an sawi.
RTPS Act hi thuam that zel a ni a, a tirah chuan service 46 an pe chhuak thei a, tunah chuan ti pungin service 140 pek chhuah theih a ni tawh a, heng bak hi dan belh turin hmalak mek a ni.
He dan hmang hian sorkarin mipuite hnena service a pek chhuah te chu hun bi tiam chhungin a dil tu hnenah pek zel tur a ni a, chhan leh vang mumal awm lo a, hun bituk chhunga service an dawn loh chuan dilna hnawl a nih atanga ni 30 chhungin lungawilohna hi thlen tur a ni a, a mawhphurtu sorkar hnathawk chu cheng 500 atanga cheng sang 5 thleng chawi tir theih a ni.
RTPS Act hi sorkar pawh hian a ngaipawimawh hle niin a lang a, Chief Minister Lalduhoma’n a kaihhruai sorkar lak luh a nih hlima thuthar thehdarhtute a kawmnaah pawh an hmalakna tur zingah RTPS Act hi chu a taka hmang nghal turin department tinte hma la turin a lo chah tawh a ni.