Cyclone Remal vangin Aizawl hmun hrang hrangah chhiatna tam tak a thleng a. Melthum Quarry bula in chim a chhiatna thlengah he thu buatsaih lai thleng hian ruang 14 lakchhuah ni tawhin, Mizo sawm leh vai pali te an ni. Mi pahnih chu dam a chhanchhuah an ni. Chhanchhuah hnathawh hi State Disaster Response Force (SDRF) te, Melthum Local Council leh YMA tangkawp chuan an la kalpui zel bawk.
Hlimenah leimin avangin mi pali in nunna an chan a, chhanchhuah hna thawh kalpui zel a ni. Salem vengah mi pathum- hmeichhia pahnih leh mipa pakhat in nunna an chan an ni a. Falkawnah mi pahnihin nunna an chan bawk.
Kelsih leh Lungsei-ah leimin avangin mi pakhat ve ve an boral. Aibawk-ah mi pahnih an boral a, ruang lakchhuah tum a beih mek a ni.
Chief Minister Lalduhoma leh Disaster Management and Rehabilitation Department Minister K Sapdanga leh officials dangte chuan chhiat tawh a hmun hrang hrang an tlawh kual nghal bawk.
Chief Minister Lalduhoma chuan Cyclone Remal avanga Mizoram chhunga chhiat tawkte tan zangnadawmna cheng vaibelchhe 15 pek chhuah tur a ruahman a, chhiat tawk chhungte hian nuaih 4 theuh dawng tura ruahman a ni bawk. SDRF dan angin sawrkar chuan chhiat tawk chhungkua hi nuaih hnih a pe phawt anga, nuaih hnih dang chu pek leh an ni ang. Hnam dang nunna chante hi an bank account ah ex gratia hi thunsak an ni dawn bawk a ni.
Chhiatna hrang hrang atan Sawrkar chuan a tul ang zelin SDRF hi a pe chhunzawm zel dawn tih sorkar thuchhuah chuan a tarlang.