Tunhnai kum 10 chhunga a vawingana atan Real Madrid kutah Champions League trophy a lut leh ta a, Inrinni zan Wembley khelmual final-ah Spanish giants hian sihnih faia Borussia Dortmund hnehin, he trophy la ngun ber an nihna belhchhahin a tum 15-na atan Europe club inelna sangberah an champion.
An head coach Carlo Ancelotti pawhin coach ni chunga he trophy la zing ber a nihna belhchhahin history a ziah belh a, coach ni chunga he title vawinga a lak tlin hma hian AC Milan player ni chungin chutih laia Europe club inelna sang ber hming atana European Cup tih a nih laiin tum hnih a lo champion tawh a ni.
London khaw final-ah hian La Liga team-in first half-ah goal an khung zo lo ni satliah mai loin German club lakah goal-a inven tawk tawk an ngai a, vawi duai lo Dortmund khan an hun tha neih bawhpelh lo se la chuan Germany ramah trophy an hawpui ngei awm e!
First half chhung hian Dortmund player Karim Adeyemi chuan tum hnih ngawt a thelh a; striker Niclas Fullkrug hit the pawhin goal ban per dawt khawpin Spanish club a rumthaih a; hliam atanga kirleh hlim Real keeper Thibaut Courtois a awm hle hle hman meuh lo a ni ber!
Second half-ah pawh goal mai thei chuang lo a, hun tawp hma minute 16 la awmah Dani Carvajal chuan Toni Kroos-a corner chhuih atangin Real goal hmasa zawk a tauhlut a; minute sarih chauh awm tawhah Vinicius Junior chuan Jude Bellingham siamsak atangin Spanish club goal hnihna leh sihnih faia Ancelotti club chakna goal ni zui ta a thawh ve leh.
Real Madrid-a a season khatnaah England star Bellingham chuan Erope club trophy lian ber a chawi nghal a; hetih lai hian Manchester United atanga loan-a Dortmund tana khel mek Englishman Jadon Sancho tan erawh han lawm viauna tur chhan a awm lem lo!
Belgian keeper Courtois khan a theihloh hlana luahlan leh harsa tur hial khawpa chetha Andriy Lunin hmakhalhin an boss duhsakna nen Europe final lianah a hum ngai a luah chho leh a, a chunga Ancelotti rinna nghah chu a tithlawn duh bik ta lo a, German club tlarhma luahtute’n nasa taka an nawr chungin goal a chhuah duh lo a, thinlung huaisen Borussia tan pawh tihngaihna a awm lo!
Tun nipui insuan hun laia Real Madrid chhuahsan tura thutlukna siam fel tawh, Euro 2024 tawp ruala football khelh bansan tum Toni Kroos bakah Real veteran player dang – Carvajal, Nacho leh hun tawp lama lut Luka Modric-te’n a vawirukna Champions League winners’ medal an awrh.
Kum 20 mi young superstar Bellingam kha a club hlui Dortmund lakah reh viau mah se Vinicius Jr goal tur a siamsak hmain ‘chance’ tha zet a hmu a, goal-ah chantir zo ta lo mah se Spain rama a season khatnaah La Liga leh Champions League trophy a phir a, kan hma lawk Germany ram Euro 2024-ah pawh hian England innghahna lian tur a ni ang.
Edin Terzic-a team Borussia Dortmund hi kum 2013 final-ah khan Wembley-ah bawk hian Bayern Munich hneh loin an tlawm tawh a; Inrinni zan pawh khan Europe-a record nei tha ber Real lakah rinkai lo zawk ni chungin bul an tan leh a, khel tha hlein, goal thun theihna hun remchang pawh nei nual mah se a tlawm zawkah bawk an tang leh ta a ni.